Charter Document - 02490058

Je Hugues dux de Bergoigne faz a savoir a touz cels qui verront ces presentes letres que en ma presence estaubliz Jehans de Noeles fiz mon seignor Andrié de Noeles ha requeneu per devant moi que il ha doné Gauteron de Senoille qui est apeléz de Noelles et Roigne sa famme suer mon seignor Hugon de Remille la maison qui fu mon seignor Poincon de Noeles qui est en la ville de Noelles et leu meix et leu corail qui est delez la maison qui fu au bossiaus et lou champ de autures et lou champ au preste qui est delez et lou champ qui fu a la Bordeliere et un champ Guillaume qui siet a la voie de Verdonnay et la come de la voie de Colomiers et dous jornex qui furent Guillaume selonc leu champ au Boitous et un jornel qui fu Hebert leu Gifart qui sit a la voie de Sauvise et leu champ des Broieres en fié et en chasemant que ce diz Gautiers et cele dite Roigne tanront deu dit Jehan et de ses hoirs tant commil viveront et ha doné en fié au dist Gautiers et a la dite Roigne et a lor bestes a huser de touz les husaiges que li homme au dit Jehan husent et huseront en la dite vile et ou finaige en bois en plain et en pastures en tel maniere que ce diz Gautiers et la dite Roigne ne puent huser des bois ne des husaiges de la ville ne dou finaige sen la ville non et ou finaige tant commil viveront en tel maniere que toutes ces chouses desux dites aprés la vie dou dit Gautier et de la dite Roigne remanront au dit Jehan et a ses hoirs a tenir perdurablement Ne li hoir de ce devant dit Gautier ne de la dite Roigne ne porront rien demander ne reclamer en ces devant dites chouses aprés li devant diz Gautiers et la dite Roigne ne tanront riens ne averont en la dite ville de Noeles et ou finaige et il huseront des chouses et des husaiges de la dite ville et dou finaige il se justiseront en la ville de Noelles et ou finaige por leu dit Jehan et por ses hoirs de toutes les chouses que a la jostise et a la signorie de la dite ville et dou finaige apartanront et apartienent Et je par ce dit Gautier et par cele dite Roigne por chouse que il soient en la dite ville ne ou finaige ne por chose que il i aient esté ne esteront ne por chose qu'il i aient tenu ne qu'il i tienent ne qu'il i tanront je ne puis riens demander ne avoir ne reclamer en la dite ville ne ou finaige Et por ceu que cen soit ferme chouse et estauble a la requeste deu dit Jehan et dou dit Gautier et de la dite Roigne j'ai mis mon seaul en ces presantes letres Ceu fu fait en l'an Jhesucrist nostre seignor que li milliaires corroit par mil et douz cenz et cinquante et sex anz