Charter Document - 02490053

Gie Hugues sires de Colches chevaliers faz savoir a toz cels qui sunt et qui seront que por ceu en ma presance estaublie Emoingarz de Drees cai en arriés suores Guillaume de Drées clerc et chanone d'Ostui ha queneu par devant moi quele ha baillié et delivré et quité a touz jours perpetualment a Jehan seignor de Neeles escuier por lui et por ses hoirs tel droit et tel raison et tel action comme el ha et puet havoir et doit en quelcune maniere en moubles en heritaiges en l'escheoite dou dit Guillaume a Blance a Barnai a Sevigné au Vaul de Voudenai et en toz autres leus çou est a savoir en eschaange et en recompensacion de vint livrées de terre les quex li diz Jehans li ha baillies et delivrées et assises a Neeles en justise en seignerie a toz jourz a lui et a ses hoirs si comme ele ha queneu par devant moi et qu'ele et sui hoir la tanront en fié de dist Jehan et de ses hoirs et gie cest eschaange ensi commil est desux diz et devisez vuel louois et outroi aut dist Jehan ceu qui ammuet de mon fié por lui et por ses hoirs En tesmoing de ces chouses j'ai mis mon seal en ces presantes letres a la priere et a la requeste de la dite Emoingart Ceu est fait en l'an de grace mil cc et sexante et quinze ou mois de janvier