Charter Document - 02490049

En non de nostre Soignor Jhesu Xprist amen En l'an de l'incarnacion de celui mil cc septante et sex ou mois de janvier nos Robers dux de Bergoigne façons savoir a touz ceaus qui verront et orront ces presentes letres que com nostre améz Johans escuiers sires de Neeles nos hait doné sa maison d'Eschanne avec lou porpris de la dite maison et dix livrées de terre an la dite vile et lou fié que messire Herviers de Turce chevaliers tenoit de lui et nos hait vendu tot lou remenant de ceu que il havoit en la dite vile d'Eschanne sauf les fiéz que il tenoit des seignors de Montoillout par tel condition que nos ou nostre hoir qui saront duc de Bergoigne ne puissons metre les dites chouses fuers de nostre mein par ce que li diz dons et li diz benefices que li diz Johanz nos ha faiz soit a des en remanbrance et en memoire de nos et des nostres nos par nos et par nos hoirs prometons en bone foi au dist Johan et a ses hoisb par sollempnel stipulation et metons en sollempnel covenance que nos les devant dites choses ou une chascune d'ales ne mettrons fors de nostre mein en tot ne en partie par don ne par vendue par eschange ne par autre maniere ques quale soit et prometons pas nos et par nos hoirs par stipulation sollempnel que nos n'irons encontre ces chouses desus dites ne consentirons ou ferons aller par nos ne par autre en fait ne engleutemant ou temps a avenir taisiblemant ne aperssemant En tesmoin de totes ces choses nos havons mis nostre seal en ces presentes letres donées et faites en l'an et ou mois desux diz