Charter Document - 02490046

Nos Hugues dux de Borgoigne façons savoir a touz ces qui verront et orront ces presentes letres que an nostre presence estaubliz por ceste chose specialment messire Gautiers de Montoillet chevaliers qui fu fils ça an arriers Garnier de Montoillet at donei et outroié an fié et an chasement permaignablement a Jehant de Neelles damoiseal et a ses hoirs quant que messire Hubers de Aschemnei chevaliers qui mors est et sui devantier tinrent et ont tenu et lour hoir tienent del dit Gautier an la vile et as finaiges de Aschemney et quant que l'on tient de lour el dit leu et quant que li hoir mon signor Garnier de Maalain tienent del dit Gautier et des hoirs monsignor Humbert dessus dit et quant que l'on tient de lour an la vile et as apertenences de Aschennoy et quant que Guillaumes et Jehanz fil monsignor Houdon Gruerial tienent del dit Gautier el dit leu les qex choses li diz Gautiers at conehu devant nos que il tenoit de Alvef et li diz Gautiers de Montoillet de ce s'est desvestuz per devant nos et an at revestu lou dit Jehan de Neelles corporelment et at promis et est tenuz par son soirement fait et donei corporelment sus sainz Evangiles de Deu per devant nos lou fié de toutes les choses dessus dites garantir au dit Jehant et a ses hoirs contre touz et que il non irat ancontre par lui ne par autre et a la dite garantie porter il at anloié ses hoirs et vielt et outroie et mande et commande a cels qui de lui tenoient ces choses que il an veingnent au dit Jehant et que il an antroient an son homaige et est a savoir que li diz Gautiers ne sui hoir ne poent hoster lou dit Jehant ne ses hoirs de lour main se n'estoit an la nostre Ou tesmoignaige de la quel chose par la proiere del dit Gautier nos avons fait metre nostre seaul an ces presentes letres Ce est fait an l'an de grace mcc et sexante nuef el mois de marz