Charter Document - 02490045

Nos Jaques humiles abbés de Nostre Dame de Chesteillon sus Seyne et nos Thiebauz priors de cel maismes leu façons savoir a touz ces qui verront et orront ces presentes letres que an nostre presence pour cette chose specialment estaubliz Adans diz Blanchez de Colonmer lou Sec et Oudeyars sa femme ont reconeu de lor propre voluntei senz force que cum il pour la nonpuissance de lor cors et pour la povretei de lour heritaige ne peussent avoir selonc aux chevance suffisant an cest siecle temporel ont donei et outroié an heritaige perpetuel a Jehant de Neelles lour signor a cui la chose devoit avenir après aux qui hoirs non ont de lour cors touz lor biens moubles et heritaiges an quel que leu que il soient ne fussent trovei an tel meniere que li diz Jehanz et sui hoir toute la vie del dit Adam et de Houdejart sa femme lour doivent doner vivre et vesteure suffisant cum a tex gens Et se il avenoit que li diz Adanz ahust hoir de son cors de ceste fenme ou d'autre s'espousée li heritaige revenroient arriers as hoirs del dit Adam an tel meniere que li dit hoir ne les porroient vendre ne aliener il ne lour hoir de lour cors et se li diz Adanz et sa fenme moroient senz hoir de lour cors ou li hoir de lour cors moroient senz hoir de lour cors li heritaige revenroient au dit Jehant et a ses hoirs senz nul reclain des autres parenz au dit Adam Et totes ces choses une chascune par soi ont promis a tenir chascune partie par devant nos par lour foiz corporelment donées an noz mains et que il ancontre ces choses dessus dites li une partie ne li autre ne venront ne feront venir an plait ne fors plait an celée ne an apert Et hont renoncié par devant nos chescune partie a tout barat a toute croiserie prise et a prendre a touz privileges donéz et a doner a toute ayide de droiz et de loiz et de costumes venus et a avenir El tesmoing de la quel chose nos avons mis noz seiax an ces presentes letres faites an l'an de grace mcclxviiii el mois de mars a la requeste de l'une partie et de l'autre