Charter Document - 02490044

Nos Jaques humbles abbés de Nostre Dame de Chesteillon sus Seynne et nos Thiebauz priors de cel maismes leu façons savoir a toz ces qui verront et orront ces presentes letres que an nostre presence por cette chose specialment estaubliz Richars de Colommer lou Sec filz Rose at reconeu par devant nos de sa bone voluntei senz contreindre que il at vendu et quittei a toz jors a Jehant de Neelles escuier la moitié del champ des Crais assis el finaige del dit Colonmer li quex fu feu Milon dit Rabohan por sexante et cinc solz de la monoie de viennois des quex deniers li diz Richars at ahu et receu del dit Jehant son plein paiement an deniers companz si com il at conehu par devant nos et s'en est tenu por bien paié et at promis li diz Richars par sa foi corporelment donée an noz mains a tenir et a garantir la dite vendue au dit Jehant bien et loialment contre totes genz et que contre la dite vendue il ne venrat ne ferat venir ne jemés riens n'i reclamerat desoranavant et at renoncié per devant nos li diz Richars a toz baraz a tote croiserie prise et a prendre a touz privileges donéz et a doner a tote ayide de droiz et de loiz et de costumes venues et a venir a tote ayide de cort de crestientei et de poestei El tesmoing de la quel chose nos avons mis nos seax an ces presentes letres a la requeste de Richart dessus nommei et ce fu fait an l'an de grace mcclxviiii el mois de marz