Charter Document - 02490042

Nos Jaques humiles abbés de Nostre Dame de Cheisteillon sus Seynne et nos Thiebauz priors de cel maismes leu faison savoir a toz ces qui verront et orront ces presentes letres que an nostre presence por ce specialment estaubliz Domengez de Colommer lou Sec filz Milon dit Raboan at reconeu par devant nos que il at vendu et quittei a toz jors an heritaige perpetuel a Naudin del devant dit Colommer demi lou champ de la corvée qui est assis antre Colas d'une part et Germain lou Saounois d'autre por sept livres de la monoie de viennois des quex deniers li diz Domengez at ahu et receu del dit Naudin son plein paiement bien et loialment et s'en est tenuz pour bien paiez si comme il at coneu par devant nos et at promis li di Domengez par son soirement fait sus seinte Evangile a tenir et a garantir la dite vendue au dit Naudin et a ses hoirs bien et loialment contre totes genz et que contre la dite vendue il ne venrat ne ferat venir ne jemés riens n'i reclamerat desoranavant et at renoncié li diz Doimengez a toz baraz a tote croiserie prise et a prendre et a toue ayide de droiz et de loiz et a tote ayde de cort de crestienté et de poestei El tesmoing de la quel chose nos avons seellées ces presentes letres de noz seax a la requeste de Doimenget dessus nommei Et ce fu fait an l'an de grace mcclxviiii el mois de janvier