Charter Document - 02490035
Charter Number: | 02490035 |
---|---|
Cartulary Title: | Le Cartulaire de la Seigneurie de Nesle |
Charter Language: | French |
Charter Origin: | Religious |
Charter Type(s): | Confirmation |
Date: | 1262 |
Date type: | Internal, A.D. |
Resource Link(s): |
|
Charter:
Nos frere Jaques humiles abbés de Sainte Marie de Chesteillon sus Seynne faisons savoir a touz cels qui verront ces presentes letres que nos fumes present el leu au dit Chesteillon le juedi aprés la Magdeleyne la ou li comandemenz mon signour lou duc de Borgoigne c'est a savoir mes sires Renauz de Grancey sires de Larrey et mes sire Guillaumes de Cheacey diserent et a droit que li amende del Soihehiz Naudin de Colonmiers honme Jehant de Naelles la quele amende li diz Jehanz at jugié a sexante et cinc solz por chief del sergent Lietiz lou Bascloys de Colonmiers qui fu trovez coupant el dit Soihehiz et portant la busche fors et chargent la charrete au dit Lietiz fu bien jugié et a droit selonc l'usaige de Borgoigne et s'en puet li diz Jehanz johir et asploitier se lui plait et de Raoul lou Saolnoys qui fu pris coupant an la forest an de Colonmiers et se rescoust au sergent jurei si cum li diz Jehanz lou disoit et de quoi li diz Jehanz disoit que cil Rauoulz avoit pacefiié a lui et fiancié et plegié six livres et dix solz et cil Raoulz mist an ney que il ne li avoit ne pacefiié ne fiancié ne plegié se per force non que il l'avoit pris et Jehanz l'emprist a prover et lou prouvat sic cum mes sire Guillaumes de Cheacey lou dist per devant cui il l'avoit provei que cil devant dit commandement lou duc per la prueve que an fu faite disarent et adroit que cil Raoulz devoit paiier au dit Jehant les dites six livres et dix solz et s'en pooit johir li diz Jehanz a sa voluntei et por chief de la parole que Germains li Saounois dist au dit Jehant qui parloit a un sien honme la quele parole fu tels que il dist que Jehanz ne faisoit a l'onme ne droit ne raison ne leautei et Jehanz li requist que li amendast ainceys que il partist de sa court et cil s'en partist senz plus faire et per lou ney que li diz Germains fist devant lou comandement lou duc que il ne avoit pas ansic dite la parole cum Jehanz disoit ne ansic partiz de devant lou dit Jehant et Jehanz l'emprist a prover et lou provat la quele amende li diz Jehanz proiat et requist au devant dit comandement lou duc que li avigeissent sour ce que il avoient ohi disarent li dit coman comandement lou duc que il an pooit bien lever six livres et dix solz et feroit bontei au dit Germain Et nos devant dit Jaques abbés de Sainte Marie de Chesteillon sus Seynne avons cels presentes letres seellées de nostre seaul Ce fu fait an l'an nostre signour mcc et sexante et dous el mois de ahost