Charter Document - 02490034

Nos Guillaumes de Cheacey chevaliers bailliz de Auxois faisons savoir a touz cels qui verront cels presentes letres que mes sire Renauz de Grancey sires de Larrey qui por lou duc estoit an cest affaire ci desouz nomnei et nos estiiens avuet lui disames et a droit que li amende de Seehiz Naudin de Colonmiers honme Jehant de Neelles la quele amende li diz Jehans at jugié a sexante et cinc solz por chief del sergent Lietiz lou Basclois de Colonmiers qui fu trovez coupant el dit Soihehiz et portant la busche fors et chergent la charrete au dit Lyetiz fu bien jugié et a droit selonc lou usaige de Borgoigne et s'en puet johir et doit li diz Jehanz et asploitier se lui plait et de Raoul lou Sounois qui fu pris coupant an la forest de Colonmiers et se rescoust au sergent juréz si come li diz Jehanz disoit et de quoi li diz Jehant disoit que cil Raoulz avoit pacefiié a lui et fiancié et plegié six livres et dix solz et cil Raoulz mist an ney que il ne li avoit ne fiancé ne plegié ne pacefié se per force non que il l'avoit pris et Jehanz l'emprist a prover et lou provat per devant nos Guillaume baillif dessus dit qui hi estoiens por lou duc donc nos devant dit comandement lou duc an ce disasmes et a droit per cele prueve que an fu faite que cil Raouls devoit paiier au dit Jehant les dites six livres et dix solz et s'en puet johir li diz Jehanz a sa voluntei et por chief de la parole que Germains li Saounois dist au dit Jehant qui parloit a un sien honme la quele parole fu tels que il dist que Jehanz ne faisoit a l'onme ne droit ne raison ne leautéz et Jehanz li requist que li amendast ainceis que il partist de sa cort et s'en partit cil Germains senz plus faire et per lou ney que li diz Germains fist devant nos de ce que il dist que il ne avoit pas ansic dite la parole cum li diz Jehans disoit ne ansic parti de sa court et Jehanz l'emprist a prover et lou provat la quele amende li diz Jehanz nos proiat et requist que nos li ajugeissiens sour ce que nos aviiens ohi donc nos disasmes et a droit que cil diz Jehanz an povoit bien lever six livres et dix solz et feroit bontei au dit Germain An tesmoignaige de toutes cels choses nos avons mis nostre seaul an cels presentes letres Ce fu fait an l'an Nostre Signour mcc et sexante et dous el mois de aost