Charter Document - 02490027

A touz cels qui cels presentes letres verront nos Jehant doiens de Saint Vynemer faisons a savoir que Guillermins de Ruygney escuiers filz mon signour Guillaume de Ruygney at reconehu per devant nos de sa bone voluntei que il at vendu a Jehant signour de Neelles escuyer lou quart des tierces de Neelles une summe de deniers des quels il se est tenuz apaiiez per devant nos anterinement et at promis et est tenuz per sa foi donée an nostre main corporelment a tenir et garantir la dite vendue au dit Jehant et a ses hoirs vers toutes genz senz jemais aler ancontre ne per lui ne per autrui per aucune meniere et se il avenoit que il hi alast ou feist aler per aucune persone il se est obligiez a ce et souzmis a nostre jurisdiction ou de celui qui seroit doiens de Saint Vynemer an cel tens que nos lui escumeniiessiens et peussiens faire escumeniier an quelcumques leu que il fesist mansion a la requeste del devant dit Jehant ou de son comandement qui cels letres nos aporteroit An tesmoignaige de la quel chose nos avons seellées cels presentes letres de nostre seaul per la requeste del dit Guillermin escuyer Ce fu fait an l'an de l'incarnacion nostre Signour mcclx quatre lou darrien jour de mai