Charter Document - 02490026

Nos Guillaumes de Cheacey chevaliers bailliz de Aussois por noble honme Hugon duc de Borgoigne faisons savoir a touz cels qui verront cels presentes letres que an nostre presence estaublis Guillermins de Ruygney escuiers at reconeu que il at vendu quittei et delivrei a Jehant de Neelles escuier a tenir a touz jours lui et ses hoirs tout ce que il avoit as tierces de Neelles c'est a savoir lou quart des dites tierces por dix livres de tornois des queles li diz Guillermins se est tenuz por paiez per devant nos an deniers nombrez Et ceste dite vendue ceste quittance et ceste delivrance lidis Guillermins at promis a tenir per son soirement fait corporelment per devant nos et a guarantir au dit Jehant et a ses hoirs contre toutes genz et se il defailloit del garantir Ancous de Alerey se est estaubliz per devant nos pleges et detres an la main au dit Jehant ou a ses hoirs de trente livres de tornois por lou defaut de la dite garantie et les porroit lever li diz Jehanz ou sui hoir del dit Ancous ou de ses hoirs por lou dit defaut et toutes ces dites choses li diz Guillermins et li diz Ancous ont promis a tenir li diz Guillermins per son seirement dessus dit et li diz Ancous an bone foi senz aler ne faire a aler ancontre per aux ne per autrui et ont quittées toutes barres per quoi il porroient aler ou faire a aler ancontre ces dites choses et se il aloient ou faisoient a aler ancontre il nos ont donei pooir de aux contreindre as dessus dites choses tenir et de aux gaigier senz plait senz fuyte senz asloigne ausic cum de chose que ait estei jugié per nos an nostre cort Et que ce soit plus ferme chose et plus estauble per la requeste del dit Guillermin et del dit Ancous nos avons mis nostre seaul an cels presentes letres Ce fu fait an l'an nostre Signour mcc sexante et trois el mois de marz