Charter Document - 02490024

Nos freres Amaurriz de la Roche comanderres de la chevalerie del Temple an France faisons savoir a touz cels qui verront et orront cels presentes letres que nos per lou lox et per lou outroi de noz freres et por lou proffit del Temple avons acensi perduraublement a Jehant damoisial signour de Neelles et a ses hoirs lou sixte del siege del molin de la Place qui siet antre Chamesson et Esparve el finaige de la dite vile de Chamesson et tout lou droit que nos aviiens el dit molin an aigue ou defors an quelque meniere que ce fust por chief del molin ce est a savoir por trois sexteres de blef moitié froment moitié orge a la mesure de Cheisteillon sus Seynne a paier chascun an au certain comandement del Temple as octaves de la Tous Sainz et est assise ceste dite censive sus tout lou dit molin et se il avenoit chose que li diz molins chesist an desert ou que il ne suffisast a paier chascun an la dite censive a la plus grant segurtey de paiier la dite censive au termine desus nonmei li diz Jehans lou defaut de ce que li diz molins ne porroit perfaire nos assiet sus son four de Neelles an quelque leu que il siese an la dite vile ou el finaige de Neelles ou an autre et quicumques lou teingne li frere del Temple hi sunt assignei et li dux lou nos conferme come de son fié lou dit Jehant vuillant et outroiant que nos puissiens au dit four assigner et prendre les exues jusque a tant que nos fussiens anterinement paiié de la dite censive et se li comandemenz del Temple avoit nuls damaiges des lou termine dessus dit an avant que il doit lou devant dit blef an aller an venu a la dite vile de Neelles por defaut del dit paiement Jehanz devant diz ou sui hoir seroient tenu au rendre au regart de bonez genz et l'amende selonc les us del payis et por ce faisant nos an nom del Temple avons mis lou dit Jehant an corporel saisine por lui et por ses hoirs del sixte del siege del dit molin et de tout lou droit que li Temples hi avoit sic comme il est dit dessus prometanz an nom del Temple que li Temples ne irat jemais ancontre desoranavant et garantirat au dit Jehant de Neelles et a ses hoirs les choses dessus dites anvers toutes genz jusque a droit selonc l'estaublissement del ducheaume de Borgoigne et por ce que ce soit ferme chose et estauble a touz jours mais nos avons cels presentes letres seellées de nostre seaul per lou conseil de noz freres Ce fu fait an l'an de l'incarnation nostre Signour mcc et sexante et huit el mois de juillet