Charter Document - 02490023

Nos freres Jaques humiles abbés de Nostre Dame de Chesteillon sus Seynne et nos freres Thiebauz priours de cel maismes leu faisons a savoir a touz cels qui verront et orront cels presentes letres que an nostre presence estaublie Ysabiaus dameisele que fu fille Guillaume Bridayne at reconehu non mie contrainte mais de sa propre voluntei que ele per lou lox et per lou outroi de Poincet Rostie son mari at quittei et outroié perduraublement an heritaige an non de aschenge a Jehant signour de Neelles et a ses hoirs quant que ele at el finaige ne as apertenences del molin de la Place seant el finaige de Chamesson et dous jornals de terre seanz au plus prés del dit molin et les aisences el dit molin an toute sa terre de Chamesson et de Asperve an plain et an boisa et an aigue et la vaine pasture an la dite terre as bestes portanz lou blef molre au dit molin des quels choses la dite Ysabiaus de cui chief les dites choses muevent per lou lox et per lou outroi del dit Poincet son mari se est desvestue corporelment per devant nos por li et por ses hoirs et an at revestu lou dit Jehant por lui et por ses hoirs et ont promis la dite Ysabiaus et li diz Poincez ses mariz que jemais contre cette quittance outroiance et aschengement ne iront ne ne consentiront a aler per lour soiremenz donéz corporelment per devant nos sus sainte Evangile per aux ne per autrui ainz sunt tenu a garantir contre touz chalongeanz fors del signour del fié et del cens qui monte chascun an a dix deniers sus touz les biens de lour et de lour hoirs et quant a ce il ont obligié aux et lour hoirs et lour biens an quelque leu que il fussent ne peussent estre trovei et at renoncié an cest fait la dite Ysabiaus a toute exception de avouherie et de mariaige et a touz privileiges qui sunt outroié an favour de fenme et a la decevance de la moitié del droiturier pris et a toutes autres aihides de fait et de droit de crestientei et de pohestei Et por ce faisant li diz Jehanz de Neelles at assis a la dite Ysabial et au dit Poincet son mari et a lour hoirs an heritaige demi mue de blef a la mesure de Cheisteillons moitié froment et moitié avoine a prendre chescun an a la Saint Martin en yver sus son four de Colonmiers et se li diz fours nel pooit perfaire li diz Jehans et sui hoir lou doivent perfaire sus lour biens au plus prés de la vile de Colonmiers les quels choses la dite Ysabiaux et Poincez ses mariz tienent et doivent tenir an fié lige et chasement del dit Jehant et de ses hoirs et de cest dit aschenge les dites parties se sunt tenues por paiiés per devant nos et cel dit aschenge at promis li diz Jehans et an est tenuz per son soirement donei per devant nos garantir por lui et por ses hoirs ancontre toutes genz a la dite Ysabiaul et au dit Poincet son mari et a lour hoirs senz aler ancontre ne faire aler per lui ne per autrui et at renoncié a toutes exceptions et a toutes raisons et a toutes barres et a toutes aihides de droit de crestientei et de pohestei que porroient aidier a ces dites choses ampaauchier Et por ce que ce soit ferme chose et estauble a la requeste des dites parties nos avons mis noz seaus an cels presentes letres faites an l'an de grace mcc sexagesimo quinto mense maio