Charter Document - 02490017

Nos Hugues dux de Borgoigne faison savoir a touz cels qui verront et orront cels presentes letres que nous avons donei et outroié a nostre amei et a nostre feaul Jehant de Naelles damoiseal et a ses hoirs an accroissement del fié que il tient de nos quant que mes sire Herviers de Turcei chevaliers tenoit de nos an la vile et as apertenences de Aschenney an touz biens quel que il soient et an avons revistu lou dit Jehant Et volons et mandons et comandons au dit Hervier que il an veingne an l'omaige del dit Jehant et sui hoir apres lui an l'omaige del dit Jehant et de ses hoirs et est asavoir que li diz Jehanz et sui hoir tienent et tenront et doivent tenir de nos et de noz hoirs ligement ce que nos li avons donei dessus et quant que il at an la vile et as apertenences de Aschenney El tesmoignaige de la quel chose nos avons fait metre nostre seaul an cels presentes letres Ce est fait an l'an de grace mcc et sexante et sept el mois de juignet