Charter Document - 02490015

Nos Hugues dux de Borgoigne faison savoir a touz cels qui verront et orront ces presentes letres que an nostre presence estaubliz mes sire Matheus de Naelles chevaliers at reconehu per devant nos que il quitte a touz jors senz nul reclain de son asponegrez et non mie contrainz a Jehant damoiseal signour de Naelles et a ma dame Harmengeart dite Blanche dame de Sombernon fille mon signour Matheu de Hastez et a lour hoirs apres ce que les parties furent faites del devant dit Matheu et del devant dit Jehant lou fié de Cormoillon et s'en est desvistuz li devant diz Matheus per devant nos et an at anvistu lou devant dit Jehant et la devant dite Harmengeart corporelment et at promis cil diz Matheus per sa foi donée corporelment garantir cele quittance de cel fié devant dit au dit Jehant et a la dite ma dame Harmengeart et a lour hoirs de lui et de ses hoirs bien et leiaulment et que il contre ceste quittance ne vanrat ne autrui an non de lui ne ferat venir de ci an avant ne nule chose n'i reclamerat El tesmoignaige de la quel chose nos avons mis nostre seaul an ces presentes letres a la requeste del dit Matheu Ce fu fait an l'an de grace mcclviii el mois de marz