Charter Document - 02490013

Nos Hugues dux de Borgoigne faizons savoir a touz cels qui verront cels presentes letres que cum discorde fust antre les hommes de l'aschenge de Colonmiers qui furent nostre honme de une part et Jehant signor de Neelles de autre part ces dites parties ont conehu per devant nos que il ont accordei et pacefié antre aux an tel meniere que de vint livres de la monoie corrant an Borgoigne que le dit honme de l'eschenge devoient audit Jehant de Neelles chascun an lou jour de feste saint Remei que de ces vint libres li dit honme ont fait au dit Jehant trente livres de cele maisme monoie et se les dites trente livres ne estoient payés audit Jehant ou a ses hoirs ou a lour certain comandement chescun an a Colonmers dedanz les octaves de la Saint Remei cels dites trente livres seroient quarante livres et pour les dites quarante livres se eles ne estoient payées dedanz les huit jours aprés ansiguanz li dit honme ont anloié an la main au dit Jehant et de ses hoirs aux maismes et touz lour biens moubles et non moubles an quelque leu que il seroient trovei pour paiier les dites quarante livres au dit Jehant ou a ses hoirs ou a lour certain comandement et se il avenoit per aventure que li diz Jehanz ou sui hoir ou lour comandemenz vendissent les choses as diz honmes por lou defaut del dit paiement tele vendue cum li diz Jehanz ou sui hoir ou lour comandemenz an feroient li dit honme et lour hoir sunt tenu del faire et del louher a cels a cui la dite vendue seroit faite et li dit honme de l'eschenge ne lour hoir ne se puient metre an la vile de Colonmiers ne el finaige an autrui justise fors que an la justise Jehant et a ses hoirs et li diz Jehanz ne sui hoir ne puient demander autre justise as diz honmes que tele ne a lour hoirs cest a savoir que li dit honme del dit eschenge esliront chescun an lou jour de la nativitei Saint Jehant Baptistre dous des proudonmes del dit eschenge et cil dui proudonme eslehu tenront la justise de touz les honmes et de toutes les fenmes del dit eschenge et cil dui proudonme doivent jurer Jehant ou a ses hoirs ou a lour certain comandement an la vile de Colonmiers que il a bone foi des amendes que venront per devant lour des diz honmes et des dites fenmes del dit eschenge et que hi eschenront et seront jugiés rendront au dit Jehant ou a ses hoirs ou a lour certain comandement an la vile de Colonmiers doues foiz an l'an c'est a savoir a Pasques et a la Touz Sainz et les amendes sunt teles que li amende que monteront a sexante et cinc solz per la costume de Borgoigne doit estre amenée a la moitié et li amende de sept solz a douze deniers et se li dui honme qui seroient eslehu per la communaltei faisoient nul deffaut anvers lou dit Jehant ne anvers ses hoirs li diz Jehant ne sui hoir ne les puient ajorner per devant aux ne gaigier ne travaillier mais lour doivent querir li diz Jehant ou sui hoir par nos ou per nostre comandement lou tort fait se il lou faisoient et nos ou nostres comandement ou nostre hoir devons faire johir lou dit Jehant ou ses hoirs des diz dous honmes selonc la costume de Borgoigne et li diz Jehanz ne sui hoir ne puient plus demander as diz honmes del dit eschenge ne a lour hoirs an nule justise que soit se li dit honme del dit eschenge ne faisoient chose per quoi il deussent perdre la vie del cors ou aucun menbre selonc les costumes de Borgoigne et se ce avenoit la justise est au dit Jehant ou a ses hoirs ou a lour comandement et se nuls qui fust demandoit aucune chose as diz honmes del dit eschenge li dit honme doivent faire droit per les diz dous honmes qui seroient eslehu de la conmunaltei del dit eschenge ne l'on ne les puet ne ne doit autrement contreindre et se il avenoit chose que li dit honme ou aucun del dit eschenge presissent les fenmes au dit Jehant ou a ses hoirs qui an portassent les meis taillaubles et asploitaubles au dit Jehant et a ses hoirs et les heritaiges por ce ne seroient il pas quitte que il ne paiassent la taille au dit Jehant et a ses hoirs et se li honme au dit Jehant ou a ses hoirs prennoient les fenmes del dit eschenge que an portassent lour heritaiges por ce ne seroient il pas quitte que il ne paiassent la mise que seroit sus lour de ce que cil del dit eschenge devroient Et se li honme audit Jehant et a ses hoirs ne autre faisoient tort a aucuns honmes del dit eschenge li dui honme qui seroient eslehu per la conmunautei lou querroient au dit Jehant ou a ses hoirs ou a lour comandement que lou tort fait lour feist deffaire et amender et se il nel faisoient deffaire et amender li dui dit honme eslehu lou querroient a nos ou a noz hoirs ou a nostre comandement que nos lour fesissiens deffaire et amender lou tort fait que lour auroit estei faiz Et se li sergenz au dit Jehant ou a ses hoirs jurez de Colonmiers prennoit les honmes del dit aschenge ou lour choses an forfait li diz sergenz les doit rendre maintenant as diz dous honmes eslehuz de la conmunaltei del dit aschenge et li dui dit honme sunt tenu de regarder se il hi at forfait ou non et doivent garder et rendre au dit Jehant et a ses hoirs si cum il est dessus dit Et por ce que ce soit plus ferme chose nos avons mis nostre seel an ces presentes letres per la voluntei et per lou outroi del dit Jehant et des diz honmes del dit aschenge Ce fu fait an lan de grace mcc et sexante et cinc el mois de septembre lendemain de la saint Matheu