Charter Document - 02490012

Ego Hugo dux Burgundie notum facio omnibus presentes litteras inspecturis quod ego excambiavi dilecto et fideli meo Andree domino de Neelles et Matheo fratri suo quicquid habebam et tenebam apud Colonmerium Siccum et in finagio ejusdem tam in hominibus quam in justiciis et rebus aliis et maxime quicquid homines mei de Colonmerio habebant in finagio dicte ville ad illum totum quod dicti dominus Andreas et Matheus frater suus de Neeles habebant vel habere poterant apud Villebarnei tam in hominibus quam in omnibus rebus aliis et maxime dotem quam Alaydis filia domini Willermi de Marrigneyo militis tenet relicta scilicet Huonis fratris supradictorum Andree et Mathei apud Vilebarney excepta excasura domine Sumbernionis et heredum suorum si forte contingerit eis evenire in villa de Vilebarney teneor vero et promisi eisdem ea que excambiavi eis in dicta villa contra omnes bona fide garantire et sciendum est quod neque ego neque heredes mei homines illos de Colonmerio qui sunt de excambio neque heredes ipsorum neque alios homines neque heredes ipsorum quos dicti Andreas et Matheus fratres in dominio suo tenebant in dicta villa tempore excambii super nos in aliquo loco possumus nec debemus de cetero retinere et maxime in eadem villa non possumus nec debemus aliquid habere nec reclamare nisi forte de novo a dominis dicte ville acquisierimus Sciendum est preterea quod sepe dictus Andreas dominus de Neelles illud quod sibi excambiavi in sepe dicta villa et in finagio ejusdem de me tenebit in feodum ligium et dictus Matheus frater suus partem suam de ipso Andrea similiter in feodum ligium tenebit Et ut hoc ratum et futurum in posterum habeatur presentes litteras sigilli mei munimine roboravi Actum anno gratie mcc quadragesimo secundo prima die mensis aprilis