Charter Document - 02490006

Nos Hugues dux de Borgoigne façons savoir a touz cels qui verront cels presentes letres que an nostre presence estaublie mes sires Esteynes Boujons chevaliers nostre feaux at reconeu devant nos que il at mariée Gertrui sa fille a Jehant de Neelles qui fu filz mon signor Andrier de Neelles heritaublement por prendre son droit an toux les biens celui Esteyne que il at et que il attent a avoir anvers touz les hoirs celui Esteine qui sunt et qui avenir sunt et at reconeu cil Esteines per devant nos que il at donei a celi Gertrui quatre vinz livrées de terre a digenois des queles il li doit asseoir maintenant quarante livrées et les autres quarante livrées a la premiere escheoite que venrat an descendant Toutes ces choses cil Esteines at outroiiés et donées a sa fille heritaublement as bons us et as bones costumes de Borgoigne si cum il at reconeu devant nos Apres cil diz Jehan at reconeu per devant nos que il at douhée celi Gertrui sa femme as bons us et as bones costumes de Borgoigne El tesmoignaige de la quel chose per la requeste de l'une partie et de l'autre nos avons fait metre nostre seel an cels presentes letres Ce fu fait an l'an de grace mcc et cinquante quatre el mois de novembre