Charter Document - 02490003

Ge Hugues dux de Bergoigne faz a savoir a touz cels qui verront ces presentes letres que Jehanz de Naelles filz mon signor Andrier de Naelles et Katherine sa suers fille au dit Andrier estaubli an ma presence ont reconeu per devant moi que il ont parti et devisei antre aux dous tout l'eritaige lour pere et lour mere an tel meniere que per lou lox et per la voluntei de cele dite Katherine fors de toutes avouheries cil dix Jehanz an porte por son partaige toute la vile de Naelles et toute la terre de Baalou et toute la terre de Colunmers et toute la terre de Charantois an honmes an rentes an toutes ascheoites et an toutes issues an signorie et an toutes apertenences et touz les fiéz de l'eritaige son pere et sa mere et tout l'eritaige sa mere an quelque leu que il soit et toutes ascheoites que puient avenir en tel meniere que cele devant dite Katherine toutes cels choses devant dites per devant moi at quittei et outroié a cel devant dit Jehant por son partaige a tenir a tojormés lui et a ses hoirs perduraublement se per defaute de hoir non estoit del cors de cel devant dit Jehant que toutes ces choses devant dites revenissent a cele dite Katherine Apres per lou lox de cel devant dit Jehant et per sa voluntei cele devant dite Katherine sa suers an porte por son partaige toute la terre de Nohiers et de Chempiaugrimaul et toute la terre de Vermanton an honmes an vignes an bois an prez an terres an rantes an exues an signorie an ascheoites et an toutes apertenences an tel meniere que cil devant diz Jehanz toutes cels choses devant dites per devant moi at quittei et outroié a cele devant dite Katherine por son partaige a li et a ses hoirs perdurablement se per defaute de hoir non eire de cele devant dite Katherine que toutes ces choses devant dites revenissent a cel devant dit Jehant et an tel meniere cil devant diz Jehanz et Katherine sa suers fors de toutes avouheries de toutes ces choses devant dites se sunt tenui a parti per devant moi Et por ce que ce soit ferme chose et estauble a la requeste de cel devant dit Jehant et de cele devant dite Katherine sa suer ge ai mis mon seel an cels presentes letres Ce fu fait an l'an de grace mil dous cenz cinquante et six el mois de septembre