Charter Document - 02480007

Thomas Dei gratia Ebor Archiepiscopus Anglie primas dilectis in Christo filiis Capitulo nostre Suthwellensis ecclesie Salutem gratiam et benedictionem Dudum apud vos octavo Idus Februarii anno gracia MCCC visitationis officium prout ex pastorali nobis incumbunt debito paternis affectibus exercentes quedam comparata personalia que presentibus non inseruntur prout expedire vidimus correximus tunc ibidem et aliqua alia correctione digna ut subsequitur duximus reformanda Statuentes in primis et firmiter injungentes quod vos canonici in quorum absentia nec cultus divinus nec missa gloriose Virginis Marie in cujus honore prefata fundatur ecclesia sustentatur congrue nec correctiones fiunt in choro seu capitulo debite de excessibus ministrorum ad faciendam residentiam secundum statuta ecclesie que in admissione vestra observare jurastis vos de cetero coaptatis per statuta vestra specialia providentes quod nec cultus negligatur divinus aut excessus remaneant incorrecti sic de facienda residentia disponatur quod omni tempore anni tres vel ad minus duo canonici sint in ecclesia residentes qui capitulum celebrent ipsi que negotia consulte dirigent et pertractent Et si continget ipsos dum sic presint capitulo aliquid diffinire illud succedentibus substitutis residentibus canonicis non liceat revocare nisi id errorem contineat manifestum et tunc ob hoc facta speciali convocatione confratrum per commune consilium decidatur et postmodum prout justum fuerit rationabiliter emendent Quod si forsan ex causa inevitabili et legitima licentia a nobis optenta ad tempus nullum contingat canonicum residentem committatur alicui discreto jurato regimen ecclesie quoscunque canonici ad faciendam residentiam revertant Item volumus et districte precipiendo mandamus quod alternis annis ad minus per duos discretiores de capitulo per vos communiter eligendos canonicorum omnium tam presentium quam absentium edificia subjiciantur oculis diligenter et defectus comperti quam citius per predictos duos electos vobis constare poterit de eisdem infra annum ex tunc juxta qualitatem et quantitatem ipsorum con grue reparentur Ad quod omnes quos principaliter hujusmodi defectus contingunt sine acceptatione qualibet personarum per sequestrum in prebendis suis artius interponendum et in reparationem defectuum hujusmodi si opus fuerit convertendum premissa monitione canonica compellatis Omnes libri saltem notati bene examinentur per Precentorem vel ejus vices gerentem ne sibi invicem contrarientur vel discordent in nota Et de choro etiam et cantoribus talia disponantur quod non claudicet in psallendo una parte ejusdem quam alteram in numerum prevalente et juxta discretionem vestram equaliter potius dividatur Item cum non nunquam confusionem pareat multitudo statuimus quod nisi apti necessarii et qui sufficiant in ecclesiam recipiantur ministri quibus solito promptius de suis stipendiis satisfaciatur ne pro defectu hujusmodi obsequio divino ad quod tenentur cotidie et in quo vigiles et assidui esse debent neglecto in vestrum et ecclesie scandalum ad suscitandumn jurgia ut solebant in patria vagari cogantur Si quis vero de canonicis statutis terminis eisdem ministris sua stipendia solvere tardaverit omni die quo a solutione cessaverit ad duplum salarii communis et soliti quosque satisfacerit teneatur Preterea inhibemus ne alicui quam canonico prebenda de cetero dimittatur ad firmam sine Capituli licentia speciali Statuentes quod in singulis ecclesiis vestris parochialibus sive sint prebendate sive prebendis annexe habeatis infra hunc annum a datis presentium computandum perpetuos vicarios institutos qui curam habeant animarum alioquin in vestrum defectu ex tunc ordinare proponimus de eisdem sicut vidimus expedire Et pro videatur in hujusmodi ecclesiis de libris sufficientibus et aliis necessariis ornamentis ne manus ad hoc vobis negligentibus apponere compellamur Nulli omnino ad ordines per literam capituli amodo presententur aut ad vicarias vacantes in choro vel extra aliqualiter admittantur nisi qui examinatione coram capitulo prehibita diligenti digni inventi fuerint et diutius in ecclesia laudabiliter conversati Hec nostra statuta salubria correctiones et injuncta plene et distincte singulis mensibus semel adminus in capitulo post lectum martilogium ut dum singulorum imprimitur cordibus fructus per veniat placidus in virtute obedientie perlegi et observare per omnia faciatis quousque ad eos nos contingat alias declinare et tunc cognito plenius statu ecclesie possimus si opus fuerit aliqua addere vel mutare Valete Data apud Scroby pridie non Junii anno gracia MCCC secundo pontificatus nostri tertio