Charter Document - 02451076

Reverendo patri et domino A dei gratia summo pontifici B Exoniensis ecclesie minister humilis et devoti filii sui de Burgo et Eboracensis abbates salutem et debite subiectionis obedientiam Ad ventilandam causam que inter abbatem sancti Albani et priorem Dunelm[i] super ecclesia de Tinemuthe vertitur iuxta sanctitatis vestre mandatum die partibus prefixo in unum pariter convenimus Illo die in presentia nostra comparuit prior Dunelm[i] lectisque literis vestris coram multitudine religiosorum virorum et clericorum [ut] in causa illa procederemus instanter postulabat asserens Dunelm[i] ecclesiam temporibus plurium advocatorum episcoporum etiam auctoritate diu pacifice et quiete ecclesiam de Tinemuthe possedisse sed demum per secularem potestatem et laicorum violentia monachos Dunel[mi] violenter eiecto[s fu]isse et eorundem laicorum violentia sine episcopali auctoritate sancti Albani monachos fuisse intrusos Sue autem electionis et aliorum intrusionis auctorem fuisse predictus prior dicebat Robertum de Mubrai comitem Norhamhumbrie qui succes[s]erat quibusdam aliis comitibus quorum largitione asserebat Dunelmi ecclesiam prefatam ecclesiam de Tinemuthe adeptam fuisse Ad huius rei assertionem proposuit duo autentica scripta in quorum altero Waldevus quondam comes Norhamhimbrorum qui tertius fuit ante predictum Robertum de Mubrai protestatus est se dedisse et scripti sui munimine confirmasse beato Cuthberto et monachis Dunelm[i] ecclesiam de Tinem cum omnibus que tempore facte confirmationis habebat vel postmodum erat habitura Hec autem donatio et confirmatio ut in illa autentica carta continebatur facta fuit in ecclesia Dunelmi Walchero eiusdem ecclesie episcopo gen[eralem] sinodum celebrante et eos perpetuo anathemate condemnante qui unquam ullo tempore sepe dictam ecclesiam de Tinem ab ecclesia Dunelmi alienare presumerent Al[terum au]tentic[um] script[um] fuit Willelmi quondam Dunel[mi] episcopi successoris prenominati Walcheri in quo comprehensum fuit eundem Willelmum concessisse et sua carta conf[irmasse do]nationem ecclesie de Tinemuthe quam Walthevus comes monachis in Dunel[mi] ecclesia deo et beato Cuthberto perpetuo servituris fecerat sua [carta et auctoritate] sua perpetuo anathemate condemnavit omnes illos qui ecclesiam de Tinemuthe ecclesie Dunelmi auferre quandoque temptarent His auditis allegabat pars prioris illa instrumenta puplica esse et per se sufficere ad fidem nobis de possessione faciendam Ut tamen nos certiores redderet producebat quosdam clericos et laicos viros [qui vide]ba[n]tur magne etatis quos dicebat vidisse monachos Dunel[mi] ecclesiam de Tinemuthe pacifice possedisse et presentes fuisse ubi illi violenter expulsi [fuerunt] et monachi Sancti Albani per laicalem potestatem violenter intrusi Et quoniam senes erant et valitudinarii et alia vice sine magna difficultate [assere]bat eos non posse produci rogabat nos attentius ut ab eis veritatem erueremus ne eorum morte vel absentia causa eius aliquod detrimentum pat[eretur His itaque com]pletis quidam monachi et clerici qui ab abbate Sancti Albani missi fuerunt literas abbatis nobis porrexerunt protestantes eum gravi infirmitate [fuisse deten]tum et ideo se presentiam suam exhibere non posse Sed prior Dunel[mi] dicebat dimidium anni fere effluxisse postquam citatio facta fuerat et se et tanta [mora fuisse gra]vatum licet nos diem illum de consensu partium prefixissemus Adiecit igitur quod causa civilis erat et per procuratores agi poterat presertim [] [dorse] [eum abbas] alias causas ibi per interpositas personas tractari faceret et ideo videbatur ei quod causa frustatorie dilationis et subterfugii aberat et ab illo gravamine [d]e iustitia Romane sedis ut dicebat plenius confidens audientiam vestram ad festum sancti Hilarii terminum prefigens appellavit Nos autem [cum] appellatio in literis vestris remota non fuerat causam illam ad vestre discretionis examen remittendam esse censuimus Valeat sanctitas vestra