Charter Document - 02450141

B dei gratia dictus episcopus Exoniensis omnibus fidelibus ad quos presentes littere pervenerint salutem Causam que vertebatur inter ecclesiam Wigorniensem et ecclesiam de Oseneia super ecclesia de Begeberia nobis delegavit dominus papa cognoscendam et iudicio vel concordia terminandam Cum vero in nostra presentia partes instructe comparerent tandem de consilio nostro et sapientium qui aderant et quia dominus papa ad compositionem quam ad iudicium ex litterarum suarum indicio pronior videbatur venerabilis frater noster Rogerus Wigorniensis episcopus et Radulfus prior et monachi Wigorniensis ecclesie qui nomine conventus sui aderant et item Eadwardus abbas et Hardingus prior et canonici qui nomine ecclesie Oseneie venerant in arbitros compromiserunt sub attestatione veritatis se eorum subicientes arbitrio Arbitri vero tam pro bono pacis quam pro exequenda voluntate domini pape decreverunt ut ecclesia Oseneiensis memoratam ecclesiam de Begeberia cum capellis et omnibus pertinentiis suis et libertatibus et libera administratione et omni integritate tam vicarie quam aliarum rerum ad ipsam pertinentium salvo in omnibus iure dioecesani episcopi in perpetuum possideat reddendo ex causa compositionis annuatim Wigorniensi ecclesie lx solidos nomine canonis duobus terminis in festo sancti Michaelis sive infra viii dies xxx solidos in pascha sive infra viii dies pasche xxx solidos et eos priori et monachis Wigorniensibus ad predictos terminos mittet Preterea Wigorniensis episcopus canonicum quendam ad minus xx annorum nec publica infamia laborantem qui competenter regulam et conventum sequi possit in ecclesia Oseneie ponet qui pro Wigorniensi ecclesia et pro episcopo deo prestet obsequium et obeunte canonico illo episcopus qui pro tempore fuerit alium sub forma prescripta sub rogabit ita tamen sequens episcopus canonicum ibi ponet si positus a predecessore suo mortuus fuerit Que ut sine fraude intelligantur hoc intellectu sint interpretanda ut ecclesia de Oseneia duos simul predicta de causa positos non habeat canonicos Conventus etiam Oseneie universi scilicet et singuli pro episcopo Wigorniensi tale suffragium orationum facient in vita et in morte quale fit pro fundatoribus et abbatibus suis Audito autem arbitrio partes utriusque ut spoponderant adquieverunt et debet hec compositio ex compromisso tam prefati episcopi Wigorniensis quam utriusque ecclesie scripto et sigillo vicissim roborari Quod ut ratum inconcussumque permanent sigilli nostri impressione roboravimus Hiis testibus Hamelino Gloecest A de Evesham Iohanne de Messend Willelmo de Lileshell abbatibus Roberto de Kinillewrd Rem de Selford prioribus Roberto Oxenef R de Surreia Simone Wygorn archidiaconis Iohanne decano Cicestr Iohanne thesaurario Exon Willelmo decano de Licheffeld I cancellario Cicestr magistro Moyse magistro Silvestro Roberto monacho magistro Roberto do Anc magistro Rogero et Turstino canonicis Exon Osb canonico de Kinillewrd Philippo canonico de Derbi magistro Roberto de Gildeford Nicholao presbitero de Avinton Iohanne de Lilleshell Ascat de Messend canonicis Hec autem compositio facta est in capitulo Saresb coram multis et magnis et prudentibus viris anno incarnationis domini MCLXXIII