Charter Document - 02450109
| Charter Number: | 02450109 |
|---|---|
| Cartulary Title: | Exeter 1046-1184 Volume 11 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1161 - 1181 |
| Date type: | Assigned |
| Resource Link(s): |
|
Charter:
Omnibus fidelibus ad quos presens scripture pervenerit Bartholomeus dei gratia dictus episcopus Exoniensis salutem in domino Noverit universitas vestra controversiam que vertebatur inter monachos de Hida et canonicos de Lanthon super ecclesia de Berton nobis et venerabili fratri nostro Ade abbati de Evesham a papa Alexandro tertio fuisse delegatam Cumque prefatus abbas sicut asserebat die novissima partibus constitute adesse non posset vices suas secundum formam mandati apostolici ad causam iustitia vel concordia mediante terminandam nobis plene commisit Interveniente autem illustris regis Anglorum Henrici secundi industria et diligentia in hac pacis forma lis tota in perpetuum sopita est Ecclesia et canonici de Lanthon quicquid inter eos et monasterium seu monachos de Hida die compositionis huius ante factam compositionem monachis petentibus et canonicis possidentibus in controversia vertebatur totum illud hidem canonici perpetuo possidebunt solvendo inde pro bono pacis et nomine transactionis monachis de Hida annuatim viginti murenas quas vulgo lampridas dicunt et quinque esicios quos vulgo salmones vocant ita ut hec prima dominica quadagesime vel ante sint apud Hidam persoluta Reliquum vero quod monachi de Hida quocumque titulo pacifice tunc possidebant et ante possideant sicut non fuerat in controversia sic preter compositionis huius continentiam perpetuo possidebunt In controversia vero tunc vertebatur ipsa ecclesia de Berton et iste ipsius pertinentie capella videlicet de Neuton et totum ius parochiale ipsius ecclesie ita tamen quod de dominio regis canonici non habebunt nisi sex acras bladi nomine decimarum ad electionem suam et unum mullonem feni de prato de Northebroch super Brandesberiam unde fenum vehitur in curiam regis et omnes minutas decimas et decimas pisarum et fabarum et preterea de liberis hominibus triginta gaillnas de chereschet Monachi vero quiete possidebant et possideant reliquas decimas totas de blado de dominio regis et pratum quoddam inter Neuton et Wherewellam infra aquas et decem acras extra quod pratum totum nec monachi nec canonici dicebant ad predictam ecclesiam de Berton pertinere sed monachos antiquo iure possidisse