Charter Document - 02450033

Omnibus ad quos presens scriptum pervenerit Robertus dei gratia Exoniensis episcopus salutem in domino Noverit universitas vestra quod venerabilis Baldewinus de Reveriis Exoniensis comes filio suo Ricardo concedente et plenarium assensum prebente pro remedio anime sue et precipue pro anima uxoris sue Adeliz et patris sui Ricardi et matris sue Adeliz et pro omnium predecessorum successorumque suorum animabus totam terram cum capella sancti Iacobi extra Exoniam et cum decima et omnibus pertinentiis suis quas Walterus filius Wlwardi ex eo libere et quiete tenuit ipso Waltero rogante et concedente quicquid iuris et dominii in eis habebat herede sua Edith assentiente deo et monasterio sancti Petri de Cluniaco et sancti Martini de Campis ad sustentationem monachorum Cluniacensium ibidem deo et sancto Iacobo servientium per manuum mearum investituram donavit et irrevocabiliter confirmavit cum eadem libertate et liberis consuetudinibus quibus terram suam de Toppesham tenuit et habuit Insuper concessit iam dictis monachis ut omnes terras suas et homines possessiones et elemosinas quas habent vel in posterum iure ac legaliter adquirere poterunt infra fines totius terre sue et feodi sui habeant et teneant solutas liberas et quietas ab omnibus exactionibus subiectionibus hundredis placitis querelis et omni servitio et opere servili et theloneo et omnibus consuetudinibus que excogitari poterunt Preterea vero pia devotione concessit ut prefati monachi et homines eorum habeant quamlibet mensuram et libertatem vendendi et emendi et res suas modis omnibus iuste multiplicandi In terra etiam sua concessit ut habeant absque omni impeditione liberum introitum et reditum cum rebus suis et communes pascuas animalibus suis et iuncos in marisco absque emptione et omnem communitatem profectum et refugium in omni loco qui ad se spectare dinoscitur Siquid vero fores facti vel querele inter homines eius et homines monachorum quacumque occasione incident monachi plenaria de qualibet causa curiam et iusticiam suam habeant propriam et emendationem Hec itaque omnia sepe dictis monachis donavit et iure proprietatis transactavit ita quod in eos nec sibi nec alicui ex heredibus suis aliquid violente potestatis exercere licebit nisi tantummodo contra adversantium molestias defensionis auxilium Et quia hec predicta predictorum fratrum sustentationi minime sufficere estimavit divini amoris instinctu totam ecclesiam de Tuveriton cum capellis et omnibus pertinentiis suis permissione et assensu meo donavit et scripto autentico confirmavit volens ut monachi ab omni vexatione liberi et immunes orationi vacent et deum pro se et suis indesinenter exorent Preterea prefatus Baldewinus illustris comes Exon ecclesie sancti Iacobi tantum benefitii ex voto conferre tenetur unde sacer monachorum conventus constitui et sustentari poterit Quod ne tractu temporis vel malignantium versutiis in dubium revocetur ego sicut dioecesanus episcopus ad petitionem tam Baldwinus comitis quam Ricardi eiusdem monasterii prioris presenti scripto et sigilli mei appositione confirmavi salva semper auctoritate nostra et successorum nostrorum episcoporum Actum ab incarnatione domini anno millesimo centesimo quadragesimo sexto apud Exoniam Hiis testibus Walterio de Piriton Hugone de Auco Radulfo filio Iocelini archidiaconis magistro Willelmo Cucufel Philippo de Furnell Iohanne Paz Stephano de Mandevilia Huberto de Vaus Radulfo Patrich Roberto de Scocis Rogero Abbate Willelmo filio Radulfi et fratre suo Roberto Hugone clerico de Coleford Roberto de Giverni Guidone de Britevill Willelmo des Musters domino Roberto abbate de Tavistoke Ricardo filio Radulfi Willelmo de Morevilla et filiis sepe dicti Baldewinus comitis Ricardo Willelmo Henrico Iocelino filio Nigelli Gaufredo de Lega militibus Ricardo et Edwardo monachis