Charter Document - 02450031
| Charter Number: | 02450031 |
|---|---|
| Cartulary Title: | Exeter 1046-1184 Volume 11 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1145 - 1146 |
| Date type: | Assigned |
| Resource Link(s): |
|
Charter:
Reverentissimo domino et patri Eugenio dei gratia summo pontifici sanctitatis sue servus Robertus eadem gratia Exoniensis ecclesie devotus minister salutem cum debita obedientia Cum in omnibus veritati standum sit ibi precipue veritatis testimonio innitendum est ubi ipsa maxime periclitatur Unde cum nunc de periculo et diminutione matris nostre Cantuariensis ecclesie agi audiamus cui frater noster et coepiscopus Bernardus de sancto David debitam ex subiectionis professione obedientiam subtrahere velle dicitur non sine periculo nostro veritatem tacere posse videmur Confidenter igitur et secure in conspectu maiestatis vestre attestamur quod retroactis temporibus inconvulsum stetisse audivimus et nostris deinceps illibatum stetisse cognovimus Predicta itaque metropolis nostra cum in multis et magnis dignitatibus pre ceteris regni nostri ecclesiis a temporibus beati Augustini Anglorum apostoli multipliciter effloruerit a nobis antehac auditum non est quin predicti Bernardus predecessores prefate metropolitane sedis archiepiscopis suffraganei obedientes extiterint et ab eis denique consecrati et illis scripto professionis obligati fuerint Ut autem et ad tempora moderna et ad ipsum Bernardus redeamus ipse per impositionem manus Radulfi bone memorie Cantuariensis archiepiscopi promotus fuisse et scripta professione que adhuc in eadem ecclesia permanere dicitur obligatus teneri dinoscitur Postmodum vero istum ad vocationes bone memorie Willelmi Cantuariensis archiepiscopi frequenter venire et eius canonicis iussionibus tanquam unum ex ceteris suffraganeis suis obedienter et sine contradictiones obtemperare meminimus et vidimus Iste denique est qui a venerabili domino Alberico Hostiensi episcopo tunc apostolice sedis legato ad patris nostri Theodbaldi qui nunc eidem Cantuariensi ecclesie presidet consecrationem evocatus tanquam suffraganeus et minister atque cooperator astitit Ea propter cum eodem et pro eodem archiepiscopo nostro sanctitati vestre supplicantes exoramus ne suggestione sepe dicti Bernardus que ex fabulosa antiquitate sive ex antiqua fabulositate fundamentum et initium sumit aurem accomodetis sed pretaxatam matrem nostram in dignitatum suarum statu incolumem servetis Bene valeat paternitas vestra in Cristo domine pater