Charter Document - 02450023
| Charter Number: | 02450023 |
|---|---|
| Cartulary Title: | Exeter 1046-1184 Volume 11 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1137 |
| Date type: | Assigned |
| Resource Link(s): |
|
Charter:
Willelmus dei gratia Exoniensis episcopus omnibus dilectis deo fidelibus ad quos presens scriptum pervenerit salutem et dei benedictionem Dilectissime nobis fraternitati vestre notum facimus quod diu lis versata inter fratres nostros canonicos Plimton ecclesie et karissimum nobis filium Reginaldum de Valletorta super ecclesia sancti Andree de Sutton in nostri presentia placitata nobis sortita est finem Nam cum partes utreque ad nos convocate fuissent ut deo complacuit in seniores provincie se pariter contulerunt ut quod ipsi iuramento de lite hac probarent omnes perpetuo ratum haberent Iuraverunt itaque ad hoc electi senes Leovricus de Chadelawda et Wlmarus de Colaford super textum evangelii quod a maioribus suis audierant et menti vexerant et ipsi etiam in temporibus quorum memores esse poterant apertissime viderant quod priusquam Normanni Angliam conquisissent ecclesia Sutton membrum Plimton ecclesie habebatur et persone Plimton ecclesie ipsam cum capellis et omnibus pertinentiis suis usque ad tempus quo Reginaldus de Valletorta ex regis dono susceperat Suttonam in pace tenuerant sicut suam propriam possessionem Sic igitur lite pacificata quia controversie omnis finis est iuramentum decretum est ut hanc ecclesiam canonici perpetuo in pace possideant Si quis ergo temerario ausu hanc evertere sive inquietare presumpserit sciat se divino examini subiaceri et si canonice ammonitus neglexerit emendari anathematis sententia perpetuo vinciatur Ut ergo pax hec memoriter teneatur carte huius et sigilli nostri attestatione et subscriptorum assignatione testium ipsam roboravimus Hec sunt testium nomina Robertus archidiaconus Exoniensis Hugo archidiaconus Totton Willelmus archidiaconus Corn Edmarus de Cuic