Charter Document - 02450017
| Charter Number: | 02450017 |
|---|---|
| Cartulary Title: | Exeter 1046-1184 Volume 11 |
| Charter Language: | Latin |
| Charter Origin: | Religious |
| Charter Type(s): | Foundation |
| Date: | 1127 |
| Date type: | Internal, A.D. |
| Resource Link(s): |
|
Charter:
Quoniam multiplicatis malis super terram viri iniqui filii Belial undique ad hoc invigilant ut nequissimis adinventionibus sponsam Cristi ecclesiam sanctam et immaculatam vel perturbent vel subvertant caventes imposterum et tam ecclesie quieti quam gregis domini saluti providentes scriptis memorie commendare curavimus que oblivione deleri tempore succedente pertimuimus Imperante igitur et in eterna beatitudine regnante mundique machinam solo nutu moderante una et individua trinitate anno ab incarnatione domini millesimo CXXVII totius Britannie monarchiam rege Henrico disponente sedique Cantuariensis archipresulatus Willelmo presidente ego Willelmus Exoniensis ecclesie pastor licet indignus servus servorum dei humillimus dolens temporibus meis tepidius et indecentius solito et iusto in quibusdam ecclesiis regimini meo commissis a clericis eisdem deputatis laudes dei frequentare et extolli decrevi viros ydoneos et religiose eruditos in eis substituere ut dignas deo gratias ibidem agant et tam pro populi quam pro suis excessibus sine intermissione intercedant Unde factum est ut tam regis predicti quam archipresulis ceterorumque coepiscoporum meorum et provincie mee optimatum consilio fretus et auxilio pro delictorum meorum remissione in ecclesia sancti Stephani de Lanzavetona canonicos secundum sancti Augustini regulam viventes constituerim et confirmaverim reddens eis et concedens imperpetuum possidenda omnia que eiusdem ecclesie iuris sunt tam in terris quam in aliis reditibus ita libera et quieta ab omnibus consuetudinibus et exactionibus sicut erant dum ego ipse ea tenerem Si quis autem huius nostre donationis et confirmationis contra legum decreta et patrum instituta preter [eorum] votum violator presumptuosus extiterit sit pars eius cum Dathan et Abyron fiant dies eius pauci et episcopatum eius accipiat alter ceterasque que in eodem psalmo subsequuntur incurrat maledictiones nisi resipuerit et digne satisfecerit Facta est autem hec donatio et huius donationis confirmatio sub istorum qui subscribuntur testimonio clericorum et laicorum Odo archidiaconus magister Leowinus Robertus Blundus qui hanc cartam scripsit et dictavit Willelmus Lotharingus Walterus filius Gotsellini Willelmus filius Theobaldi Hugo de Orbec Herveus clericus episcopi Godefridus de Mannavilla