Charter Document - 02440239
| Charter Number: | 02440239 |
|---|---|
| Cartulary Title: | Bath and Wells 1061-1205 Volume 10 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1197 - 1205 |
| Date type: | Assigned |
| Resource Link(s): |
|
Charter:
Omnibus Cristi fidelibus presentem cartam inspicientibus Savaricus divina permissione Bathon et Glaston episcopus eternam in domino salutem Cum ex debito pastoralis officii universis et singulis nostro regimini subditis nos fateamur existere debitores ipsis tamen propensiori sollicitudine tenemur prospicere qui regulari discipline subditi rei familiaris ampliori affliguntur inopia Eapropter attendentes honestatem simul et paupertatem Muchelniens cenobii et fratrum ibidem deo servientium qui in iniuriam religionis assumpte coguntur annis fere singulis ob inopiam victualium gravissima incomoda sustinere deliberatione provida statuimus et episcopali auctoritate eis confirmavimus ut omnes garbe ecclesie eorum de Sumerton de illa videlicet portione que ad eos ab antiquis temporibus dinoscitur pertinere libere et quiete plenarie et integre ad victus eorum necessaria cedant cum servitiis hominum ad fondum ipsius ecclesie pertinentium salvis vicariis ad presentationem abbatum et monachorum in eadem ecclesia statuendis toto altalagio terris quoque arrabilibus et omnibus obventionibus et minutis decimationibus tam de animalibus quam de aliis rebus ad ipsam ecclesiam sive ad eius capellas pertinentibus Unde ipsi vicarii omnia emolumenta salvis ipsis monachis omnibus garbis et hominum servitiis plenarie percipient et omnia onera tam episcopalia quam archidiaconalia cum auxilio competenti dictorum abbatis et monachorum sustinebunt Ut autem predicta robur perpetue firmitatis optineant presentis carte nostre munimine pacis et pietatis intuitu predictis abbatij et monachis Muchelnie confirmavimus