Charter Document - 02440217
| Charter Number: | 02440217 |
|---|---|
| Cartulary Title: | Bath and Wells 1061-1205 Volume 10 |
| Charter Language: | Latin |
| Charter Origin: | Religious |
| Charter Type(s): | Statement |
| Date: | 1202 - 1205 |
| Date type: | Assigned |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Savaricus divina permissione Bath et Glaston episcopus eternam in domino salutem Que dicimus veritati debemus que promittimus fidei Sane cum dilecti filii monachi Glaston super multis articulis per literas apostolicas questionem nobis movissent labores pariter et sumptus declinare volentes ut nos ab instantia litis absolverent et ad pacem et concordiam nobiscum pariter convenirent in presentia delegatorum nobis a summo pontifice iudicum videlicet domini Elyen episcopi et abbatis sancti Edmundi et prioris sancte Trinitatis Cantuar amicabiliter utrimque conveniendo promisimus ea que in scripto eorumdem iudicum continebantur ubi sua dependebant sigilla apposita fideliter observare et siqua secundum eiusdem scripti tenorem de contentis ibi peragenda supererant bona fide effectu prosequente complere Unde cum ex debito inter cetera teneamur tres partes militum ad ius et dominatum ecclesie Glaston spectantium priori et conventui eiusdem ecclesie confirmare quarta nobis parte cum militibus sicut et in terrarum possessionibus reservata contenti esse decrevimus pro quarta parte militum in militibus illis videlicet qui ad feoda et terras assignate nobis quarte portionis retineri noscuntur concedentes et confirmantes priori et conventui Glaston ecclesie milites illos secundum terrarum et feodorum distributionem qui tres partes eis assignatas contingunt ita videlicet ut si milites aliqui fuerint qui communiter nobis obsequia pro portionibus nostris diversa et distincta teneantur inpendere si duplex homagium facere noluerint nobis videlicet et priori Glaston de excambiendo illorum servitio et homagio per compensationem mutuam inter nos et priorem virorum bonorum arbitrio amicabiliter et congrue debeat convenire Si vero aliquis de militibus ad partem monachorum assignatis homagium suum nobis optulerit illud non recipiemus set ipsum ad monachos mittemus et monachi idem facient si forte aliquis ad eos venerit qui quartam partem nobis assignatam contingat Quod ut firmum perseveret et stabilem presenti scripto et sigilli nostri munimine duximus roborandum Valete