Charter Document - 02440216

Charter Document - 02440216


Charter Number: 02440216
Cartulary Title: Bath and Wells 1061-1205 Volume 10
Charter Language: Latin
Charter Origin: Religious
Charter Type(s): Statement
Date: 1202 - 1205
Date type: Assigned
Resource Link(s):

Charter:

Universis Cristi fidelibus ad quos presens scriptum pervenerit Savaricus divina permissione Bathon et Glaston episcopus eternam in domino salutem Que dicimus veritati debemus que promittimus fidei Sane cum dilecti filii monachi Glaston super multis articulis per litteras apostolicas questionem movissent labores pariter et sumptus declinare volentes ut nos ab instantia litis absolverent et ad pacem et ad concordiam nobiscum pariter convenirent in presentia delegatorum nobis a summo pontifice iudicum videlicet domini Elien episcopi et abbatis sancti Edmundi et prioris sancte Trinitatis Cant amicabiliter utrinque conveniendo promisimus ea que in scripto eorumdem iudicum continebantur ubi sua dependebant sigilla apposita fideliter observare et si qua secundum eiusdem scripti tenorem de contentis ibi peragenda supererant bona fide effectu prosequente complere Unde cum ex debito inter cetera teneremur archidiaconatum in septem ecclesiis priori et conventui Glaston ecclesie confirmare quem bone memorie Reginaldus Bath episcopus predecessor noster Henrico quondam venerabili abbati Glaston et eius successoribus concesserat et confirmaverat prefatum archidiaconatum in subscriptis septem ecclesiis priori quicumque fuerit et conventui dicte Glast ecclesie duximus confirmandum eodem modo quo abbatibus et monachis eiusdem loci a memorato predecessore nostro deliberatione provida sicut in ipsius scripto autentico continetur fuerat preconcessum ita quidem quod ecclesia sancti Iohannis Glaston ecclesia de Mere ecclesia de Streta ecclesia de Budeclegh ecclesia de Sapewik ecclesia de Merling ecclesia de Sowy de cetero nulli respondeant archidiacono nec nobis ipsis vel successoribus nostris in aliquo nisi in hiis que de iure sine auctoritate episcopali non poterunt terminari videlicet divorciis et in appellationibus ad nos vel successores nostros factis vel faciendis et in personarum institutionibus et solempnibus penitentiis parochianorum et clericis ordinandis et ecclesiis dedicandis et salvo quod denarios sancti Petri persolvant quos hactenus persolvere consueverunt Que concessio et confirmatio nostra ut firma et stabilis in posterum perseveret eam presenti scripti munimine duximus roborandam