Charter Document - 02440053
| Charter Number: | 02440053 |
|---|---|
| Cartulary Title: | Bath and Wells 1061-1205 Volume 10 |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1136 - 1166 |
| Date type: | Assigned |
| Resource Link(s): |
|
Charter:
Rodbertus dei gratia episcopus Bathon universis sancte matris ecclesie filiis tam presentibus quam futuris id ipsum sapere in domino Quoniam dispositiones rerum ecclesiasticarum episcopali cure faciendas decretorum et canonum pagine concedunt oportet ipsos episcopos vigilanter attendere ut ipsi bene sibi conscii pio affectu et sincero caritatis intuitu dei timore pre oculis habito nullius gratia inducti nullius potestate oppressi que in domo domini disponenda sunt canonice disponant Quod nos pro discretione nostre parvitati gratia dei collata attendentes pio affectu affectus etenim noster testante divino eloquio operi nostro nomen imponit statuimus d[e]cernimus et in virtute obedientie precipimus quatinus in ecclesia sancti Andree apostoli Well cum quilibet canonicus dei dispositione de medio factus fuerit eiusdem due partes prebende in usus canonicorum viventium per totum a[nnum] subsequentem cedant qui iuxta consuetudinem ecclesiarum sancte et religiose ordinatarum debitas exequias per totum eundem annum pro fratre defuncto digne concelebrantes persolvant Terciam autem partem eiusdem prebende iuxta testamenti dispositionem canonici morientis dari statu[im]us et precipimus aut pro suis debitis si alieno ere gravatur sive pro ceteris suis negociis quocum[que mod]o ab eodem vita comite canonice disponatur [et a]d maiorem caritatis cumulum statui[m]us et in virtute obedientie precipimus quatinus unusquisque canonicus ecclesie Well de terra prebende sue pl[enam decim]am illi ecclesie donet cui iuxta eiusdem prebende territorii situm iure dare debuerit Hoc nostri statuti decretum hanc nostre dispositio[nis auctori]tatem totus conventus prefate ecclesie diligenter et caritative studeat observare et superius positam dignitatem de dispositione prebendarum a no[bis conce]ssam firmiter quiete et inconcusse retineat Utramque etenim in utraque presentis scripti nostri auctoritate confirmamus et sigilli nostri impressione corroboramus adicientes supradictis et in virtute obedientie precipientes statuimus ne quis canonicus sepe nominate ecclesie de prebenda sua gratia cognationis vel propinquitatis sive privati obsequii aliquid imminuat vel in deterius mutet videlicet terram rusticorum nullatenus alicuius privata amicitia vel servicio vertat in liberum servicium et si quid huiusmodi detrimenti ab eo sive a predecessore suo ante nostre prohibitionis huius cognitionem factum fuit cum omni diligentia studeat dispersa congregare et cum omni devotione congregata tanquam patrimonium Iesu Cristi satagat observare Valeat semper in domino et oret pro nobis fraternitas vestra