Charter Document - 02430034

Omnibus Cristi fidelibus ad quos presens scriptum pervenerit P[etrus] divina miseratione Wintoniensis ecclesie minister humilis salutem in domino Ex officio pastorali tenemur viros religiosos qui pauperes spiritu esse pro Cristo neglectis lucris temporalibus elegerunt speciali affectu diligere et quieti sue sollicite providere ut tanto uberiores fructus de continua in lege Dei meditatione percipiant quanto con turbationibus malignorum amplius fuerint ex ecclesiastica defencione securi Inde siquidem est quod nos bone memorie G[odefridi] quondam Wintoniensis episcopi predecessoris nostri vestigiis inherentes dilectos in Cristo filios nostros canonicos regulares de Mottesfont locum et monasterium eorum quod dilectus in Cristo filius Willelmus Briwer in eadem villa in honore summe et individue Trinitatis in solo suo fundavit possessiones etiam et redditus ecclesias sive decimas quas in episcopatu nostro rationabiliter adepti sunt vel in posterum Deo donante iustis modis poterunt adipisci sub nostra et Wintoniensis ecclesie protectione suscepimus et specialiter auctoritate officii confirmamus episcopali auctoritate firmiter inhibentes ne quis locum in quo divino sunt mancipati officio seu alias possessiones eorum invadere vi vel fraude vel ingenio malo occupare audeat vel retinere aut fratres conversos servientes vel homines eorum aliqua violentia perturbare sive ad eos fugientes causa salutis sue conservande septis curie sue violenter presumat extrahere Precipimus autem ut in eodem monasterio de Mottesfont ordo canonicus et regularis conversatio secundum regulam magni patris Augustini quam primi inhabitatores professi sunt observetur et ipsum monasterium cuiuslibet alterius domus religiose subiectione liberum permaneat absolutum Inter possessiones autem ipsorum has specialiter duximus exprimendas ex dono predicti Willelmi Briwer totam terram quam habuit apud Mottesfont item decimas de essartis de Sombourn et decimas de terra et de essartis de Hackel item decimam acram terre de predictis essartis item ecclesiam de Stok et ecclesiam de Essel et ex dono Iohannis Briwer ecclesiam de Parva Sombourn et ecclesiam de Eling de dono domini regis Iohannis cum omnibus libertatibus et earum pertinendis habendas et tenendas imperpetuum et in usus proprios ipsorum canonicorum salvis competentibus vicariis perpetuis convertendas salvo in omnibus iure episcopali auctoritate et dignitate Wintoniensis ecclesie Quod ut in posterum ratum permaneat et inconcussum presenti scripto et sigilli nostri patrocinio duximus confirmandum Dat apud Suthwerk per manum P[etri] Russinol clerici nostri non Maii pontificatus nostri anno iii Testibus hiis Willelmo de Huntedon et R Wintoniensi archidiaconis Gregorio capellano I de Mara magistro Alano de Stokes magistro R de Pavill magistro I de Ramesbir G de Caleston Dionisio clericis et multis aliis