Charter Document - 02430001
| Charter Number: | 02430001 |
|---|---|
| Cartulary Title: | Winchester 1205-1238 Volume 9 |
| Charter Language: | Latin |
| Charter Origin: | Religious |
| Charter Type(s): | Inspeximus |
| Date: | 1206 - 1218 |
| Date type: | Assigned |
| Resource Link(s): |
|
Charter:
Universis sancte matris ecclesie filiis ad quos presens scriptum pervenerit Petrus Dei gratia Wyntoniensis episcopus salutem in domino Ad universitatis vestre volumus pervenire notitiam antiquitus talem factam fuisse compositionem inter ecclesias de Hyda et Aulton ex parte una et ecclesiam de Waverle ex parte altera super decimis de Netham sicut ex inspectione auctentici intelleximus Sciant presentes et secuturi compositionem hanc factam fuisse in synodo Wyntoniensi in presentia domini Henrici episcopi inter ecclesiam sancti Petri de Hyda et ecclesiam beate Marie de Waverle super decima de Netham quod ecclesia de Waverle persolvet ecclesie sancti Petri de Hyda singulis annis ad festivitatem sancti Michaelis quadraginta solidos pro supradicta decima hac sane conditione quod ecclesia de Hyda providebit capellanum familie de Netham Hiis testibus Hugone abbate de Certes Gaufrido priore Sancti Swithuni Hugone archidiacono Alardo priore Sancti Dionisii Goscelino mag[istro] Set quoniam futuris temporibus posset ecclesie de Aulton preiudicium generari ex eo quod non est in autentico evidenter distinctum quantum debeat de quadraginta solidis predictis solvi ecclesie de Aulton et quantum ecclesie de Hyda cum tamen monachis de Hyda due marce solute sint tantum annuatim et una ecclesie de Aulton unanimi consensu conventus de Hyda et conventus de Waverle et consilio prudentum ordinamus ut ecclesia de Waverle persolvat singulis annis in festo sancti Michaelis pro omnimodis decimis de Netham ecclesie beati Petri de Hyda duas marcas et ecclesie de Aulton unam marcam Tenebitque ecclesia de Waverle predictas decimas de Netham quiete pacifice et integre ita quod decetero predicte ecclesie de Hyda et Aulton amplius aliquid predicta ecclesia de Waverle pro predictis decimis de Netham exigere non poterunt et ecclesia de Waverle similiter occasione istius compositionis terras aliquas in parochia de Aulton in dampnum ipsius ecclesie non poterit vendicare Ne igitur imposterum aliquid possit venire in dubium predictam compositionem inter dictas ecclesias intervenisse illam sigilli nostri munimine confirmamus Hiis testibus Eustachio de Faukebergh Hugone abbate Belli Loci Regis magistro Alano de Stokes Gregorio capellano magistro Petro Roiusinol magistro Roberto Basset magistro Thoma de Eblesbourne Stephano clerico et multis aliis