Charter Document - 02420180
| Charter Number: | 02420180 |
|---|---|
| Cartulary Title: | Winchester 1070-1204 Volume 8 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1176 - 1188 |
| Date type: | Assigned |
| Resource Link(s): |
|
Charter:
Ricardus dei gratia Winton episcopus universis Cristi fidelibus ad quos presens scriptum pervenerit eternam in domino salutem Sicut de vestra omnium karitate confidimus nemo ex vobis est qui se ad opus bonum non gaudeat incitari Ea propter universitatem vestram in domino propensius exhortamur quatinus sanctorum limina quotiens oportunitas vobis celitus fuerit collata devote et suppliciter visitetis et de peccatis vestris studeatis a domino veniam iugiter implorare Nos autem de misericordia omnipotentis dei et meritis gloriose genetricis dei Marie et beatorum apostolorum Petri et Pauli omniumque sanctorum confisi omnibus vobis qui ad ecclesiam de Porcestr que auctoritate nostra per manum venerabilis fratris nostri P Menevensis episcopi consecrata est in anniversario die dedicationis sue sive infra octavas eiusdem devote conveneritis de iniuncta vobis canonice penitentia decem dies relaxamus et orationum ac beneficiorum omnium que fiunt in ecclesia Winton et in aliis ecclesiis nostris participium habere concedimus imperpetuum Valete