Charter Document - 02413014

Hugo dei gratia Herefordensis episcopus omnibus personis vicariis et capellanis per episcopatum Hereford constitutis salutem gratiam et benedictionem Attendentes quam meritorium sit illi edificare domum in terris qui nos in eterna tabernacula recepturus est in celis universitati vestre mandamus in virtute obedientie iniungentes quatinus nuntios ecclesie sancti Pauli London has nostras litteras deferentes ad negotium predicte ecclesie exponendum in ecclesiis vestris benignius admittatis parochianos vestros efficaciter inducentes ut eiusdem ecclesie fraternitati se sociantes pias elemosinas suas fabrice sepe dicte ecclesie que tantos sumptus desiderat per nuntios predictos transmittant et quia scire volumus quid et quantum de una quaque parochia deo operi conferatur Precipimus ut in singulis parochiis sub duorum virorum fide dignorum testimonio fidelium elemosine colligantur Nos vero de dei misericordia confisi omnibus operis predicti benefactoribus si contriti fuerint et confessi viginti dies de iniuncta sibi penitentia relaxamus ratas habentes indulgentias a fratribus nostris concessas et concedendas benefactoribus operis memorati Durent iste littere per septuennium Data die Exaltationis Sancte Crucis anno gratie MCCXX octavo