Charter Document - 02410296
| Charter Number: | 02410296 |
|---|---|
| Cartulary Title: | Hereford 1079-1234 Volume 7 |
| Charter Language: | Latin |
| Charter Origin: | Religious |
| Charter Type(s): | Composition |
| Date: | 1219 |
| Date type: | Internal, A.D., Calendar |
| Resource Link(s): |
|
Charter:
Universis sancte matris ecclesie filiis ad quos presens scriptum pervenerit H dei gratia Herefordensis episcopus eternam in domino salutem Cum anno ab incarnationis domini millesimo ducentesimo decimo nono inter venerabilum virum H abbatem et conventum Gloucestrie ex una parte et magistrum Walterum de Gersintone rectorem ecclesie de Rodeforde ex altera super decimis quorundam assartorum et molendinorum et feni in parochia de Rodeforde et quodam servili obsequio quod auxilium abbatis nuncupatur et libera moltura et quodam horto apud Ledene et pastura in dominico eiusdem abbatis et rebus aliis questio coram nobis verteretur partibus in presentia nostra sufficienter constitutis tam ad componendum quam ad litigandum decimo octavo kalendas Maii tandem lis amicabiliter conquievit hoc fine videlicet quod abbas et conventus Gloucestrie concesserunt dicto magistro Waltero et suis successoribus in ecclesia de Rodeforde decimas feni de pratis habitis a rusticis de Hamme infra parochiam de Rodeforde Preterea exactionem predicti servilis obsequii quod ipsi a prefato magistro Waltero exegerunt quietam eidem quoad vixerit clamaverunt salvo post decessum ipsius Walteri iure tam ecclesie Gloucestrie quam ecclesie de Rodeforde item decem marcas quas idem abbas et monachi ab eodem Waltero petiterunt nomine pene cuiusdam arbitrii quam asserebant fuisse commissam gratis eidem Waltero remiserunt Magister vero Walterus remisit dicto abbati et conventui gratis et absolute omnia ea super quibus eis moverat controversiam exceptis decimis feni pratorum infra parochiam de Rodeford sicut superius dictum est salvis ecclesie de Rodeforde libertatibus et consuetudinibus quas tempore istius compositionis habere dinoscebatur Et ut ista compositio robur obtineat firmitatis eam auctoritate pontificali confirmamus Et in huius rei testimonium perpetuum sigillum nostrum apposuimus huic scripto et ad maiorem securitatem diviso inter nos cyrographo sigilla earum eidem appendi fecimus cuius unam partem sigillo nostro et sigillo predicti Walteri signatam predictis abbati et conventui Gloucestrie tradidimus alteram vero sigillo nostro et sigillo dictorum abbatis et conventus munitam predicto Waltero contulimus Hiis testibus []