Charter Document - 02410264
| Charter Number: | 02410264 |
|---|---|
| Cartulary Title: | Hereford 1079-1234 Volume 7 |
| Charter Language: | Latin |
| Charter Origin: | Religious |
| Charter Type(s): | Certification |
| Date: | 1206 |
| Date type: | Assigned |
| Resource Link(s): |
|
Charter:
Sanctissimo in Cristo patri I dei gratia summo pontifici humiles et devoti filii sui W Londoniensis E Herefordensis R Sancti Asaph H Land R Bangorensis G Menevensis episcopi salutem et cum omni devotione ac reverentia debitam domino et patri obedientiam Noverit sancta paternitas vestra quod cum venerabilis frater noster Savar bone memorie Bathoniensis episcopus concessisset in fata et tam Bathoniensis quam Wellensis ecclesia suo fuisset viduata pastore prior et conventus Bathon et decanus et capitulum Wellens ad quos ius eligendi episcopum pertinere dinoscitur in unum pariter convenerunt habitoque prout moris est super electione episcopi diligenti tractatu pari tandem voto et unanimi assensu in Magistrum Ioscelinum canonicum Wellensis ecclesie virum providum literatum et honestum consenserunt ipsumque invocata spiritus sancti gratia in pastorem et episcopum suum canonice ac sollempniter elegerunt Cui nimirum electioni illustris Rex Anglorum Iohannes suum adhibuit benignus assensum Quia vero Cantuariensis ecclesia suo noscitur orbata pastore supplicamus sancte paternitati vestre quatinus nuntios dictarum ecclesiarum benignius admittentes prenominato electo munus confirmationis conferre dignemini