Charter Document - 02410239

Willelmus dei gratia Hereford episcopus omnibus sancte matris ecclesie filiis ad quos presens scriptum pervenerit salutem in eo qui salus est omnium Noverit universitas vestra causam que vertebatur inter Willelmum de Burchull militem et Willelmum camerarium super terra de Herlingeham primo in curia nostra postea in comitatu Hereford hoc fine tandem conquievisse Willelmus quidem de Burchull predictam terram de Herlingeham tanquam terram que iure hereditario eum conti[nge]bat adversus nominatum W camerarium cum litteris domini H Cant archiepiscopi tunc totius Anglie iusticiario clamabat asserens [Robertum Lambert] patruum suum eandem terram tota vita sua pacifice iure hereditario possedisse Et in ea diem extremum vite sue nullo alio relicto herede preter ipsum clausisse super hoc autem testes quamplures fide dignos hos ipsum probare offerentes producebat Et ut sibi eiusdem terre restitutio fieret postulabat Willelmus vero c[am]e contrario asserebat se prenominatam terram ex dono predecessoris nostri Roberti Foliot bone memorie Hereford episcopi tanquam vacantem post mortem predicti Roberti Lambert ass[e]cutum fuisse ipsumque eandem terram diutius quiete et pacifice nullo contradicente possedisse Cumque causa hec diutius tam in nostra presentia quam in comitatu Hereford [placi]tata fuisset amicis hinc inde intervenientibus hunc finem sortita est Willelmus quidem cam[erarius] ius sepedicti Willelmi de Burchull in eadem terra recognoscens eandem terram c[oram can]onic[is] Herefor[] militibus totius comitatus sub presentia etiam Ade de Eston tunc seneschalli nostri in hoc ex parte nostra assensum prebentis una cum carta predicti predecessoris resignavit et eam tactis sacrosanctis evangeliis pro se et heredibus suis in perpetuum ab iuravit Constitutis postmodo in presentia nostra tam W de Burchull quam W camerario factam [inter] eos conventionem plenius recognoscentes ut eam ratam haberemus Et ut homagium et fidelitatem debitam de sepedicto W de Burch reciperemus instanter postulabant Inspectis itaque cartis Gilleberti Fol[iot] Lond episcopi et Roberti Foliot predecessorum nostrorum in quibus servicium annuatim predicte terre continebantur in nullo ius nostrum vel successorum ledi attendentes prefatam conventionem ratam habuimus et sepenominato W de Burch terram de Herlingeham cum omnibus pertinentiis suis sub annua sex solidorum pensione nobis successoribus nostris per[solvenda] perpetuo tenendam concessimus salvo regali s[ervicio] Pro hac nostra concessione dedit nobis predictus W de Burch unam marcam argenti et Willelmo cam[erario] octo mar[cas argenti Quod qu]ia firmum et stabile manere volumus presenti scripto et sigilli nostri attestatione confirmamus Hiis testibus Ada de Eston tunc senescallo Waltero de Travel constabulario Rogero le Poh Hugone de Dunre Hugone de Wlf Willelmo de Weldebof [] de Stanf Roberto de Boclinton Reginaldo de Burch Ricardo de Maslo Seer de Dimoc Rogero filio Mauricii et multis aliis