Charter Document - 02410208
| Charter Number: | 02410208 |
|---|---|
| Cartulary Title: | Hereford 1079-1234 Volume 7 |
| Charter Language: | Latin |
| Charter Origin: | Religious |
| Charter Type(s): | Settlement |
| Date: | 1195 - 1198 |
| Date type: | Assigned |
| Resource Link(s): |
|
Charter:
Universis sancte matris ecclesie filiis ad quos presens scriptum pervenerit Willelmus dei gratia Hereford ecclesie minister humilis eternam in domino salutem Quoniam lites que transactionis beneficio finem sortiuntur ad futurorum notitiam in scripturam rediguntur universitati vestre presenti pagina significandum duximus controversiam que vertebatur inter monachos Hereford et monachos de Brechen super decimis de dominio Herberti de Furcis in Bodeham assensu de Glouc et Sancti Martin de Bello abbatum hoc fine conquievisse ita videlicet quod monachi Heref percipient duas partes decimarum bladi totius dominii prenominati sive predictum dominium a domino vel villano vel quolibet alio cuiuscumque sit conditionis possideatur Et ideo de cetero percepturi sunt duas partes decimarum de tresdecim acris quas Willelmus Toch et Willelmus filius molendinarii tenent et de tribus buttis et sex acris quas Radulfus de cimiterio tenet et de tribus acris quas tenet Adam presbiter et de tribus acris quas tenet Hugo filius Agnetis et de novem acris quas Iordanus tenet et de duabus acris quas Simon filius Ricardi tenet que omnia fuerunt de dominio Et si forte dominus illius dominii vilanagium in dominium converterit monachi Hereford nichil de decimis illis sub tali pretextu sibi poterunt vendicare sed monachi de Brechen illas decimas totas percipient Preterea de partibus nemoris illius dominii que converse sunt vel de cetero convertentur in agriculturam a quocumque possideantur monachi Hereford medietatem percipient monachi vero de Brechen alteram medietatem Preterea monachi Hereford percipient medietatem decimarum feni et de pisis et de fabis de supradicto dominio et monachi de Brechen alteram medietatem et insuper iidem monachi de Brechen percipient omnes minutas decimas ad altare provenientes Et ut hec conventio rata de cetero permaneat et inconcussa eam fideliter observandam utraque pars in verbo veritatis in presentia nostra promisit et nos eam sigilli nostri munimine et sigillis ecclesiarum utriusque partis ne inposterum super hoc emergat ambiguitas confirmare curavimus Hiis testibus Willelmo precentore Hereford Magistro Simone Magistro Nicholao de Hampton canonicis magistro Roberto Grossi Capitis Magistro Osberto et Willelmo capellanis Willelmo et Hugone de Bodeham Willelmo de Kylpek et Nicholao capellanis Helya medico Willelmo coco Waltero de Esbeche Roberto filio Ricardi Ricardo decano de Brechen Bernardo Nicholao et Willelmo capellanis Willelmo Deweas Aluredo Brun et multis aliis