Charter Document - 02410161

Universis sancte matris ecclesie filiis Robertus dei gratia Hereford episcopus perpetuam in domino salutem Universitati vestre notum facimus quod cum causa que vertebatur inter canonicos de Kenell et monachos de Stanley super decimis de Stanley nobis ab apostolica sede appellatione remota cognoscenda et terminanda commissa fuisset eadem causa partibus in presentia nostra constitutis hoc fine quievit Ex parte siquidem monachorum de Stanley per manum N abbatis et monachorum suorum in manu nostra fideliter promissum est quod monasterium de Stanley solvet inperpetuum pro memoratis decimis v marcas argenti et dimidiam monasterio de Kenell et dimittet eidem monasterio de Kenell omnes terras et tenuras quas die transactionis tenebat in pace et sine querela inperpetuum tenendas adiectum quoque est ex parte monasterii de Stanley et in manu nostra fecerunt promissum quod si contigerit idem monasterium de Stanley terras aliquas infra parochiam de Stanley vel alias parochias ecclesiarum de Kenell terras aliquas quocumque modo acquirere ex quibus emolumentum decimarum ecclesiis de Kenell die transactionis pervenerit monasterium de Stanley inde decimas sine contradictione persolvet Quicquid autem retro temporibus de decimis ad ecclesiam de Stanley pertinentibus a monachis de Stanley detentum est ad instanciam nostram pro bono pacis prior et canonici de Kenell eis humiliter remiserunt Et hanc transactionem se fideliter inperpetuum servaturos in manu nostra promiserunt Facta est hec transactio anno ab incarnatione domini millesimo CLXXX super predictis decimis memorata pecunia singulis annis de cetero ex integro ad festum Sancti Michaelis persolvenda Quod quia ratum et inconcussum inposterum manere volumus auctoritate domini Alexandri pape et nostra presentis etiam scripti sigilli quoque nostri testimonio confirmamus