Charter Document - 02410139

Universis sancte matris ecclesie filiis R dei gratia Hereford ecclesie humilis minister salutem Noverit universitas vestra causam que vertebatur inter viros religiosos canonicos ecclesie Cirenc et Reginaldum presbiterum Lamberti filium super vicaria quadam de Chiltham cognicioni nostre a sede apostolica delegatam fuisse remota appellatione terminandam que post multas hinc inde partium allegationes tandem in presentia nostra transactione mediante hoc modo finem sortita est Dominus siquidem abbas Cirenc et conventus concesserunt prenominato presbitero vicariam de qua contendebatur nomine ecclesie Cirenc perpetuo habendam sub pencione annua viginti solidorum quos idem presbiter eis solvere debet tribus terminis per singulos annos videlicet ad festum sancti Michaelis dimidiam marcam et dimidiam marcam ad annuntiationem dominice et dimidiam marcam ad nativitatem beati Johannis Baptiste Hoc quoque adiciendum nobis visum est de terra quadam quam sepedictus presbiter ad vicariam suam in eisdem cause discuscione dicebat pertinere quod tandem recognita est de laico feudo prenominatorum canonicorum esse videlicet quam pater suus usque ad exitum vite sue tenuerat Hanc terram memoratus abbas et canonici Cirenc ipsi tota vita sua habendam concesserunt tanquam laicum feudum illorum solvendo singulis annis x solidos ad terminos quibus alii homines canonicorum solvere solent censum suum Hanc autem transactionem ab utraque parte inviolabiliter observandam tam sepedicti canonici quam R presbiter in manu nostra promiserunt Ut ergo nulla oblivione possit deleri tenor huius transactionis nos eam auctoritate qua in eadem causa functi sumus confirmare et sigilli nostri appositione munire curavimus Hiis testibus priore de Lant Geroldo canonico Cirencestrie domino R magistro Godefrido Ranulfo presbitero Roberto Morin Waltero de Alra et ceteris