Charter Document - 02410073
| Charter Number: | 02410073 |
|---|---|
| Cartulary Title: | Hereford 1079-1234 Volume 7 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1148 - 1155 |
| Date type: | Assigned |
| Resource Link(s): |
|
Charter:
Gilbertus Dei gratia Herefordensis episcopus et eiusdem loci capitulum dilectis sibi in Domino sancte matris ecclesie filiis salutem gratiam et benedictionem Que communi capituli nostri consensu in nostra presentia gesta sunt placuit eorundem consilio in scriptum redigi ne quod pietatis intuitu ad honorem Dei et ecclesie utilitatem gestum est possit in posterum aut lapsu temporis aut sinistra aliquorum voluntate convelli Nos presentibus domino Rogero comite Hereford[ie] et domino Hugone de Kylpec et aliis nonnullis ad eorum instantiam piam et devotam divina pietate et pro animarum nostrarum salute episcopali auctoritate et communi capituli nostri assensu et voluntate concedimus inperpetuum et confirmamus domino abbati et conventui Glouc[estrie] in puram perpetuam elemosinam prioratum de Kylpec cum omnibus pertinentiis suis et ecclesiam sancti David cum capella beate Marie de Kylpec et cum omnibus terris pratis et decimis reditibus libertatibus et consuetudinibus et omnibus bonis suis insuper et omnes capellas dominicas predicti Hugonis cum omnibus earum oblationibus et obventionibus et omnes decimas tam maiores quam minores tam de assartis quam de aliis de omnibus terris dominicis eiusdem Hugonis videlicet de Ferna de Fenna de Bradeford de Hopton de Teinton de Blitheslowe similiter et annuam pensionem viginti solidorum de ecclesia de Bayesham et unam marcam annuam de ecclesia sancti Nicholai de Herefordia et omnes decimas pensiones et ecclesias predicto abbati et conventui in dioecesi nostra a patronis earum in elemosinam collatas aut concessas inperpetuum concedimus possidendas et habendas Ratum et gratum habetur quicquid quilibet fidelium eisdem de bonis suis pro animarum suarum salute contulerit aut conferre voluerit Confirmamus etiam permutationem quarundam terrarum de Dewischirche et de Morchote coram nobis factam inter dominum abbatem et conventum Glouc[estrie] et Rogerum Walensem de Kylpec ut inperpetuum permaneat sicut in scriptis continetur inter eos confectis Que itaque in hunc modum sunt gesta et a nobis sicut predictum est concessa et confirmata ne futuri seculi cupiditate vel malitia ullo modo mutari possint aut a predictis viris religiosis ullatenus extorqueri presens scriptum sigilli nostri appositione et capituli nostri testimonio et sigilli ecclesie nostre inpressione commonuimus Ego autem Rogerus comes omnia predicta rata habeo et sigilli mei attestatione confirmo Si quis vero deinceps hanc confirmationem nostram presumpserit impedire maledictionem Dei patris omnipotentis et beate Marie et omnium sanctorum se sciat incursurum donec predictis abbati et conventui satisfaceret competenter Hanc sententiam dedit dominus Gilbertus Hereford[ensis] episcopus pulsantibus campanis et candelis accensis in ecclesia cathedrali Hereford[ie] Ad instantiam predicti Rogeri comitis et domini Hugonis de Kylpec et aliorum multorum nobilium virorum Hiis testibus Bader[one] de Monem Roberto de Watteuyll Mauricio vicecomite Radulpho Auenel Willelmo de Milber Oliuer de la Mare Rogero de Burchull Waltero Walens[i] Waltero de Fraxino Hugone de Scudimor Alano fratre predicti Hugonis de Kylpec et aliis