Charter Document - 02410065

Dilectis sibi in Domino universis sancte matris ecclesie filiis frater G[ilebertus] Herefordensis ecclesie minister salutem que nunc est et quam speramus a Domino Que litis inquietudine quandoque turbata sunt ipsius sopito fomite denuo revocantur ad pacem Que nimirum inter aliquos reformata ne facile quibusdam emergentibus causis evanescat ut pactis legitimis firmanda est sic et excipienda scripto et in perpetuam sui soliditatem litterarum memoria testificanda pariter est et roboranda Noscat itaque vestra discretio causam que inter Iohannem clericum et Reginaldum de Pagaham super ecclesia de Credintun diu agitata est que etiam a patre nostro domno papa Alexandro delegata est ut ipsam diligenter audiremus et rationibus partium hinc inde diligenter auditis et cognitis ipsam remoto appellationis obstaculo mediante iustitia decideramus in hunc tandem modum conquievisse Nam cum Iohannes adducta testium copia iam dictam ecclesiam in integrum sibi restitui postulasset Reginaldus esse sciens ambigua fata causarum anticipando iudicium integram medietatem iam dicte ecclesie Iohanni per omnia concessit sicque cum eo transigendo liti finem imposuit Elegit enim Iohannes is oblatam sibi ecclesie portionem potius in pace suscipere quam testes suos probationibus et iuramentis honerare Tactis igitur evangeliis utrimque iuratum est ut neuter alterum sua de cetere portione fraudet sed uterque alteri ius suum integrum illibatumque conservet sane aliquo ipsorum altero tamen superstite decedente iure suo sibi in partis alterius recuperatione salvo per omnia permanente Quod quia coram nobis actum est nos ad finem pacis cuncta redigi cupientes approbavimus et transactioni in hunc modum inite assensum prebuimus ipsam ut in perpetuum convalescat presenti scripto et sigilli nostri appositione testificando confirmavimus