Charter Document - 02400413

Omnibus Christi fidelibus ad quos presens scriptum pervenerit Iohannes Dei gratia Norwicensis episcopus eternam in Domino salutem Dignum est ut nos quos divina miseratione licet indignos ecclesie sue preesse permittit viris religiosis prodesse iustis et legitimis modis quibus presumus satagamus et eorum promotionem efficaciter expedire studeamus quos sanctioris vite conversatione et meritorum abundantiori honestate in Dei ecclesia novimus preeminere Eapropter ad universorum notitiam volumus devenire nos vestigiis bone memorie I predecessoris nostri Norwycensis [episcopi] inherentes dilectis nostris in Christo monachis de Ram[eseia] concessisse canonice et confirmasse Dei causa et religionis favore subscriptas pensiones de intra notatis ecclesiis inperpetuum ad pias elemosinarum largitiones exercendas at ampliora Christi pauperibus humanitatis beneficia conterenda percipiendas videlicet de ecclesia de Walsokn xi solidos post mortem Garnerii eiusdem ecclesie rectoris et de ecclesia de Bramcester i marcam post decessum magistri Ricardi rectoris eiusdem ecclesie et de ecclesia de Riggested i marcam post mortem magistri Willelmi rectoris eiusdem ecclesie et de ecclesia de Laushull ii marcas post mortem magistri I rectoris eiusdem ecclesie et de ecclesia de Dunham duos aureos post decessum magistri Willelmi rectoris eiusdem ecclesie Preterea antiquas pensiones a pie memorie predecessoribus nostris Norwycensibus episcopis ipsis rationabiliter concessas eis canonice confirmamus scilicet ii marcas de ecclesia sancti Petri de Welles et xx solidos de ecclesia de Helingeh et i marcam de ecclesia sancti Alberti de Burnham Et ut hec nostra confirmatio stabilis et illibata in posterum perseveret eam presenti scripto et sigilli nostri patrocinio communimus Testibus Iordano capellano et aliis