Charter Document - 02400411
| Charter Number: | 02400411 |
|---|---|
| Cartulary Title: | Norwich 1070-1214 Volume 6 |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1201 |
| Date type: | Internal, Episcopal, Feast |
| Resource Link(s): |
|
Charter:
Iohannes Dei gratia Norwicensis episcopus universis Christi fidelibus per episcopatum Norwicensem constitutis salutem et benedictionem Sicut ex conmisse nobis cure pastoralis officio vos ad opera caritatis invitare et sollicite monere de iure tenemur astricti sic devotionem vestram decet salutaria monita nostra admittere et effectui mancipare Eapropter attendentes quoniam facultates hospitalis sancti Pauli Norwic infirmis et peregrinis ibidem receptis non suppetunt ad necessaria ipsis indigentibus ministranda universitatem vestram rogamus monemus et exortamus in Domino et in remissionem peccatorum vestrorum vobis iniungimus quatenus cum nuntii eiusdem hospitalis ad vos accesserint elemosinas petituri manum eis misericordie porrigatis ut per subventionem vestram ipsis infirmis possint ministrari et vos per hec et alia bona que inspirante Domino feceritis ad eterne possitis felicitatis gaudia pervenire Nos autem concedimus ut omnes qui eidem hospitali bonorum suorum partem aliquam intuitu Dei duxerint erogandum omnium orationum et bonorum que fiunt in sancta Norwicensi ecclesia participes existant Dat Norwici per manum magistri Roberti de Wellop sabbato proximo post festum sancti Gregorii pontificatus nostri anno primo