Charter Document - 02400302
| Charter Number: | 02400302 |
|---|---|
| Cartulary Title: | Norwich 1070-1214 Volume 6 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1189 - 1200 |
| Date type: | Assigned |
| Resource Link(s): |
Reference Document for this Embedded Document |
Charter:
Omnibus Christi fidelibus ad quos presens scriptum pervenerit Iohannes Dei gratia Norwicensis episcopus salutem in Domino Ex commissi nobis officii debito constringimur religiosorum commodis et utilitatibus efficaciter intendere et ut temporalis vite subsidiis non destituantur curam et solicitudinem adhibere Attendentes itaque propensius dilectorum nobis in Christo monachorum de Waleden conversationem sanctam et fervorem religionis qua plurimum pollere dinoscuntur quodque illis ad sustentationem vite nec possessiones nec redditus laici habundant in quodam beneficio ecclesiastico ipsorum insufficientie Dei causa ac religionis favore decrevimus subvenire Eapropter ad universorum volumus pervenire notitiam nos ipsis ecclesiam de Chippenham cum omnibus ad ipsam pertinentibus concessisse canonice et confirmasse in proprios usus suos perpetuo possidendam salva obedientia reverentia honore et consuetudinibus debitis sancte Norwicensis ecclesiee et honesta vicarii sustentatione qui in eadem ecclesia a nobis institutus vel successoribus nostris ad predictorum monachorum presentationem ministrabit Et ut hec nostra confirmatio firma et illibata perseveret eam presenti scripto et sigilli nostri patrocinio comunimus Testibus Thoma Brit Eustacio capellano magistro Waltero de Calna magistro Gervasio Guidone clerico Ricardo Basset