Charter Document - 02400207
| Charter Number: | 02400207 |
|---|---|
| Cartulary Title: | Norwich 1070-1214 Volume 6 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1176 - 1180 |
| Date type: | Assigned |
| Resource Link(s): |
|
Charter:
Iohannes Cicestrensis et Iohannes Norwicensis Dei gratia episcopi universis ad quos presens scriptum pervenerit salutem in Domino Mandatum domini pape suscepimus ut causam que vertebatur inter canonicos sancti Botulfi de Colecestr et Gerardum clericum super ecclesiam de Gamelingeia terminaremus Constitutis itaque partibus in presentia nostra assidentibus nobis viris religiosis et discretis cum predicti canonici ecclesiam illam predictam sibi a iam dicto Gilberto liberam resignari secundum formam mandati apostolici postulassent asserentes ipsum contra fidem et sacramentum prestitum venisse et ecclesiam illam alii censualem constituisse et Rogerus filius Reinfredi et Willelmus Avenel patroni predicte ecclesie eidem G patrocinium prestantes citius se opponerent asserentes canonicos nullum ius in ecclesia illa habere vel presentatione domini fundi vel institutione diocesani episcopi hoc fine lis tandem conquievit siquidem prefatus G ius quod habebat in predicta ecclesia sponte in manu nostra renuntiavit prestito sacramento quod nunquam per se vel per alium moverit controversiam predictis monachis super eadem ecclesia pro iure quod prius in ea habuit Et canonici ad presentationem supradictorum advocatorum per nos in personatum eiusdem ecclesie admissi sunt salvo in omnibus iure eorum quod prius in ea habuerunt Adiectum est etiam ex consensu canonicorum quod ex presentatione predictorum advocatorum et heredum suorum facta canonicis in capitulo suo et a canonicis ad episcopum in eadem ecclesia perpetui duo vicarii instituentur quorum uterque pro medietate annuatim terminis statutis iiii marcas persolvet predictis canonicis prestita iuratoria canonica de fideliter eisdem obsequanda et de pensione terminis statutis annuatim persolvenda Si autem contra factam securitatem alter vicariorum vel uterque venire presumpserit patroni nullum eis patrocinium prestabunt quominus dicti canonici debita animaversione ab eisdem vicariis ius suum consequantur Si vero contingat quod predicti advocati vel eorum successores velint ius quod iam habeant in dicta ecclesia intuitu divine pietatis et favore religionis in locum religiosum transferre non licebit eis preterquam in ecclesiam et canonicos sancti Botulfi de Colecest Hanc autem conventionem fideliter observandam a se et a successoribus suis et canonici et advocati fide et sacramento prestito confirmaverunt Et ut ipsa inviolabiliter inperpetuum observetur eam presentibus literis et sigillorum nostrorum appositione communivimus Testibus Godefrido de Luci decano sancti Martini Matheo archidiacono et aliis