Charter Document - 02400191
| Charter Number: | 02400191 |
|---|---|
| Cartulary Title: | Norwich 1070-1214 Volume 6 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1188 - 1200 |
| Date type: | Assigned |
| Resource Link(s): |
|
Charter:
Iohannes Dei gratia Norwicensis episcopus dilectis filiis priori et conventui monachorum de Acra salutem in Domino Noverit universitatis vestre devotio quod cum in nostra presentia fuisset amicabiliter compositum inter dilectos filios A de Wausingham et magistrum Lambertum et I clericum de Weseham super ecclesiis beatorum Petri et Pauli in Weseham et sancti Andree in Lechesham et ipsa compositio auctoritate nostra et sacramento fidei esset a quolibet illorum firmiter roborata nobis etiam satis constaret de assensu vestro in promotionem eiusdem A prestito et prestando memoratis clericis L et I astantibus consentientibus et id petentibus ipsum A in predictis ecclesiis personam sollempniter instituimus salva vobis et ecclesie vestre debita inde et annua pensione Ipse autem A incontinenti post ipsius institutionem tamquam persona predictos clericos I nobis ad certas portiones in eisdem ecclesiis vicarios presentavit qui I cum a nobis admitterentur ipsi A sicut moris est tamquam persone iuramentum fidelitatis publice prestiterunt Tractu temporis super hoc negotio per sacristam vestram litteras vestras patentes recepimus in quibus continebatur expressim quod quicquid a nobis super dictis I ecclesiis gestum fuerat vos ratum habuistis et gratum Quo audito I cum nichil ad plenitudinem iuris ipsius A superesset et nos parati essemus eum sicut ratio exigebat in corporalem possessionem inducere dictis clericis hic astantibus et ad hoc instantibus ipse A ob reverentiam vestri libenter sustinuit et quod restabat differri petiit donec vos super hoc conveniret ore proprio et ex abundanti pro iure suo appelavit Sic usque nunc diutius dilata fuit eius possessio corporalis quam cum a nobis instanter peteret ne possemus eam illi ulterius denegare quod potuimus tunc temporis fecimus et ipsum in possessionem pensionis ei debite de predictis ecclesiis induximus Hec est series rei geste coram nobis et a nobis et eam vobis significamus ut sciatis ita et in tantum super dicto negotio processum esse quod sicut irritari non possunt que tam sollempniter et rite acta sunt sic que agenda sunt nec iuste nec honeste negare poteritis vel aliquatenus impedire unde vobis in Domino consulimus et monemus quatinus quod vestrum est non obstante aliqua occasione frivola vel obiectione minus idonea liberaliter exequi non tardetis