Charter Document - 02380225
| Charter Number: | 02380225 |
|---|---|
| Cartulary Title: | Lincoln 1186-1206 Volume 4 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1205 - 1206 |
| Date type: | Assigned |
| Resource Link(s): |
|
Charter:
Universis Christi fidelibus ad quos presens scriptum pervenerit Willelmus dei gratia Lincolniensis episcopus salutem eternam in domino Noverit universitas vestra quod nos ratam et gratam habemus donationem et concessionem quam dilectus filius Willelmus de Albeniac tertius fecit deo et ecclesie beate Marie de Belver et monachis ibidem deo servientibus super tertia parte omnium decimarum de dominico suo de Wulstorp cum duabus partibus decimarum dominici sui predicti quas prius percipere solebant simul cum tertia parte omnium minutarum decimarum castelli sui de Belver predicte ecclesie de Wullestorp pertinentium simul etiam cum duabus partibus decimarum illarum quas prius percipiebant sicut in carta sua super hoc confecta quam inspeximus continetur eamque prout rite facta est auctoritate nostra confirmamus et presenti scripto cum sigilli nostri patrocinio communimus salvis in omnibus episcopalibus consuetudinibus et Lincolniensis ecclesie dignitate Testibus W archidiacono Bukingham magistris W Blund G de Malbertorp et aliis