Charter Document - 02372578

B dei gratia regina Anglorum ducissa Normannorum Aquitannorum comitissa Andegavorum et Iohanna quondam eadem gracia Siculorum regina et domina omnibus ad quos presens scriptum pervenerit salutem Universitati vestre notum fieri volumus quod cum Adam filius Ade de Talewrth et magister Iohannes de Tolosa Herfordensis canonicus a civibus Romanis quorum nomina in cartis mutui continentur cl marcis sterlingorum xiii solidis et iiii denariis sterlingorum computatis in marca mutuas receperint in nostra et sociorum domini nostri regis Anglorum presencia scilicet et Gaufridi de Vendosm Willelmi de Roches Rogonis de Sac et Stephani de Tornham et Guidonis de Bernez iuramento corporali se obligaverunt in nundinis Trecensibus pecuniam pretaxatam reddituros et venerabilem in Christo patrem nostrum P Portuensem episcopum creditoribus Romanis ad preces nostras sub nostro testimonio fideiussorem Et ad maiorem ipsius securitatem Iohannem de Suloeinn Guischardum Leidett Rogerum de Sancto Germano Alanum filium Alani de Sorham eidem episcopo fideiussores dederunt qui requisiti pecuniam pretaxatam reddere teneantur nisi reddiderint debitores termino constituto sicut in cartis episcopi continetur Ut igitur predictus episcopus nullum super hoc sentiat gravamen per quod domini nostri regis et nostra graciam debet pocius promereri Waltero dei gracia Rothomagensi archiepiscopo et ceteris coniusticiariis Anglie dedimus in mandatis ut si debitores vel fideiussores predicti pecuniam quam diximus sicut suprascriptum est non reddiderint ipsi eos ut pecuniam ipsam reddant et resarciant dampna et expensas si quas episcopus vel creditores incurrerint pro ea recuperanda per eorum tenementa et per eorum possessiones et quocumque modo possint districte compellant et eorum tenementa et eorum possessiones si necesse fuerit confiscantes sicut ipsi coram nobis constituerunt pecuniam ipsam de fisco regio reddere non omittant quod quia in nostra presencia et predictorum sociorum domini nostri regis presencia factum est has testimoniales litteras nostro sigillo impressas predicto episcopo duximus concedendas Testibus nobis ipsis apud Lateranum ix die Aprilis anno primo post reditum nostrum de Sirye